Vllaznia e Dorian Tafës ka fituar me përmbysje dje në ndeshjen e dytë të grupit D ndaj Vlora Volejit. Madje nëse gjërat do të kishin shkuar mirë në setin e parë, teksa shkodranet kanë kryesuar 8-4, 9-6, 16-13, atëherë mund të ishte fituar nga vajzat e Vllaznisë. Por ndodh e kundërta. Vlora Volej luan mirë dhe përmbys në 16-17. Kthen edhe një herë Vllaznia në 18-17, 21-20, por barazon Vlora në 24-24 dhe 25-25. E dy pikët e fundit janë shënuar nga Vlora Volej 25-27.
Sërish i dyti ka nisur mirë për Vllazninë, që ka kryesuar 8-3, 11-16, 14-11. Mirëpo Vlora Volej kthen në 15-16. Ka dy barazime radhazi në 19-19 dhe 21-21. Por seti është fituar nga vlonjatet 25-22. Duket sikur po shkohet drejt një fitoreje të pastër të Vlora Volejit, 3-0, por nuk ndodh kështu. 25-20 dhe 25-8 në setin më të dobët të Vlorës dhe 2-2. Në finale Vllaznia ka fituar 16-14, ndërsa trajneri Sako është sulur drejt gjyqtares Geraldina Zuna duke e akuzuar për njëanshmëri.
Ka dhe fjalë fyese, por është mbajtur nga të tjerët për të mos bërë më shumë, ndërsa ka theksuar: “Është gjynah të tallesh me të rejat në volejboll”. Pikëshënuesja më e mirë e ndeshjes Ligaj e Vlora Volejit me 25 pikë e ndjekur nga Gjethinaj e Vllaznisë me 21 pikë, si dhe Molla e Vllaznisë me 16 pikë. Në bllok ka dalë fituese Dodani e Vllaznisë dhe Ligaj e Vlora Volejit me 3 mure rezultative, si dhe A. Mehmetllari e Vlora Volejit me dy të tilla.
Në shërbim Qershia dhe Molla të Vllaznisë me katër rezultative, si dhe Veraj e Vlora Volejit me 4, por dhe Gjethina e Vllaznisë dhe Ligaj e Vlora Volejit me 3. Në total, në 5 sete, Vllaznia ka shënuar 113 pikë prej të cilave 72 pikë vetë, kurse 41 pikë kanë ardhur nga gabimet e Vlora Volejit. Në anën tjetër Vlora Voleji në pesë sete ka shënuar 94 pikë prej të cilave 64 pikë vetë, kurse 30 pikë kanë ardhur nga gabimet e kundërshtareve shkodrane.
Vllaznia – Vlora Volej 3-2
(25-27, 22-25, 25-20, 25-8, 16-14)
Vllaznia: Stolaj, Kiri (L), Gjethinaj, Zefi, Dodani, Bardeli, Molla / Culaj, Qershia, Memçaj, Laloshi. Trajner: D. Tafa
Vlora Volej: Leli, Veraj, Ligaj, A. Mehmetllari, Panajoti, Habili, Hyska (L) / K. Pashaj, Hamzaj. Trajner: A. Sako
Gjyqtare: G. Zuna, T. Kacadei (Durrës)
