ASNN – Kampionati Ballkanik i Nën-20-vjeçarëve në Shqipëri, e vendosi Asambleja në Budva. Të shtunën, në Budva të Malit të Zi, me rastin e 20-vjetorit, u mblodh Asambleja e Përgjithshme e Shoqatave të Volejbollit Ballkanik (BVA), ku morën pjesë përfaqësues të 10 shteteve. I pranishëm ishte dhe numri një i Federatës Shqiptare të Volejbollit, presidenti Erlind Pëllumbi.
Shqipëria u përfaqësua gjithashtu dhe nga Sekretari i Përgjithshëm i Federatës, Albens Vokopola. Në këtë takim u morën disa vendime të rëndësishme për volejbollin ballkanik gjatë vitit 2019, sidomos sa u takon veprimtarive rajonale dhe Shqipëria mori të drejtën të organizojë Kampionatin Ballkanik të Volejbollit të meshkujve për moshën deri në 20 vjeç.
Edhe pse data zyrtare e nisjes së veprimtarisë nuk është përcaktuar ende, besohet se Ballkaniada për Nën-20-vjeçarët do të mbahet në Shqipëri në një nga muajt e verës. Marrja nga Shqipëria e të drejtës së pritjes së Ballkaniadës për këtë moshë, bëhet në kuadër të projektit që ka Federata Shqiptare e Volejbollit për t’i dhënë impuls zhvillimi volejbollit të moshave në të dy gjinitë.
Në mënyrë që volejbolli shqiptar të përfaqësohet në vitet në vazhdim me më shumë dinjitet në aktivitetet ndërkombëtare. Dhe Ballkaniada mund të hapë një dritare të re prezantimi për shumë talente të volejbollit të meshkujve në Shqipëri, ndërsa duhet theksuar në 10-ditëshin e parë të shtatorit të vitit të shkuar, në Tiranë dhe Durrës u mbajt faza finale e Kampionatit Evropian të Volejbollit për Nën-19-vjeçaret.
