ASNN – Në kuadër të 11 vjetorit të pavarësisë së Kosovës (17 shkurt), në qytetet e ndryshme të Kosovës do të zhvillohen veprimtari të ndryshme sportive. Ndër to, në Gjakovë, zhvillohen dy duele volejbolli, një për femra e një për meshkuj, ku Kosova e Shqipëria përplasen miqësisht dhe për të parë njëherësh edhe kapacitetet e volejbollistëve të rinj.
Kështu, FSHV-ja njofton se më 16 shkurt kombëtarja e volejbollit të femrave do të përballet në pallatin e sportit “Shani Nushi” të Gjakovës me përfaqësuesen e Kosovës. Do të jetë një duel emocionues, megjithëse Kosova nuk ka një skuadër cilësore në volejboll. Ndeshja në fjalë do të luhet në datën 16 shkurt në orën 15:00. Në të njëjtën ditë e në të njëjtin pallat sporti, Shqipëria e Nën-20-vjeçarëve do të përballet me homologen e saj të Kosovës, por në orën 17:00.
Femrat do t’i drejtojë trajneri Altin Martiri, me zëvendës-trajner Roland Tarjen, kurse meshkujt do t’i drejtojë trajneri i Erzenit, Arben Sako, dhe ndihmësi i tij Agim Reka. Ndërkohë, organizmi që qeveris rrjetën në vend ka bërë publike dhe listën e volejbollistëve dhe volejbollisteve të përfaqësueses që do të luajnë në këto miqësore për nder të pavarësisë së Kosovës.
Lista e Kombëtares së Nën-20-vjeçarëve (meshkuj):
Bledi Rama, Xhulio Lumani, Emanuel Driza, Muharem Deliu, Juli Cela, Leonard Doda, Redi Bakiri, Gest Kapidani, Klaudio Barci, Eldorado Aga, Julian Talaj, Grigor Vasili, Kevi Jazexhiu, Indrit Haxhimihali.
Lista e Kombëtares së Femrave:
Artiola Rexhepi, Arnela Qershia, Cezarina Xheka, Antoneta Molla, Joana Kushi, Izabela Dodani, Diana Vistaraj, Xhovana Kacorri, Fatbardha Picaku, Nafize Bajramoglu, Luljeta Stërmilla, Elisa Beshiri.
