Komisioni i Disiplinës i Federatës Shqiptare të Volejbollit ka pasur në fokusin e vet dhe dy kryesfidat e luajtura në “Fahrie Hoti”, Tirana-Partizani për femra dhe Tirana-Vllaznia për meshkuj. Sepse në të parën është luajtur me një gjyqtar deri në rezultatin 12-11 për bardheblutë, kurse në të dytën, gjyqtarët anësorë ishin pa flamur deri në një moment të dytë. Por jo vetëm kaq, por ka pasur dhe probleme mes lojtarëve dhe gjyqtarëve, atje ku Emiljano Ndoni i Tiranës është ndër të pezulluarit.
Sipas vendimeve të Komisionit të Disiplinës, lojtari Emiljano Ndoni dënohet me 1 (një) ndeshje pezullim, shoqëruar me një gjobë prej 10.000 lekësh të rinj, bazuar në Kodin e Etikës, për sjellje antisportive. Ndërkohë, paralajmërohet klubi i Tiranës për mossigurimin e flamujve të gjyqtarëve anësorë, e cila bie në kundërshtim të Rregullores së Brendshme. Në rast se do të ketë përsëritje të mospërmbushjes së detyrimeve të tilla do të merren masat bazuar në dokumentet e mësipërm.
Për rastin e ndeshjes Tirana-Partizani në volejboll për femrave vendimi ishte: “Pezullimin e gjyqtarin Çaush Kojku me 2 (dy) ndeshje për vonesën në paraqitjes në fushën e lojës në kundërshtim me rregulloren. Në rast se do të ketë përsëritje të mospërmbushjes së detyrimeve të tilla nga ana e gjyqtarit do të merren masa të tjera ndaj tij.” Këto ishin masat, ndërsa shpresohet që në vazhdim klubet të jenë më të rregullt në drejtim të disiplinës, apo dhe të marrjes së masave organizative për zhvillimin e ndeshjes.
