Studenti i Ylli Tomorit deri në finale ka ardhur edhe falë emrit e fanellës që ka aktualisht. Sepse përtej blerjeve të dimrit, teksa u afruan bullgarët Ivanov dhe Vuldjev, pikërisht dëmtimi i këtij të fundit në finalen e Kupës së Shqipërisë prishi të gjithë strukturën e skuadrës “kampione”. Sepse Troka është pak, ndërsa në të gjitha pikat duket se është skuadër e barabartë me Tiranën.

Tentativa për të futur në lojë Qerraxhinë dhe Ledio Martiron, pasi janë lënë një kohë pushimi në stol shumë më gjatë se çfarë mendohej, duket pak e vonuar. Për të mos thënë që këto lojtarë nuk e arrijnë dot ritmin e pjesës tjetër të skuadrës me Çalin dhe Tukseferin në organizim, Trokën, Malajn, Ivanov dhe Gorenxën, sepse janë drobitur nga qëndrimi në stol.

Çfarë e garanton Tiranën të jetë e suksesshme? Së pari është i njëjti grup lojtarësh që nga fillimi i sezonit, i cili nuk ka lëvizur për asnjë çast nga fusha e lojës. Pra që nga organizatori Xhija, më pas kapiteni Ferhati, Rama, lojtari i lirë Kasemi, Pepa në rolin e bllokuesit, të cilit tashmë i është shtuar dhe Ndoni, apo dhe Lundra garantojnë një Tiranë ndryshe.

Madje dhe stoli me Xhabrahimin, Batallin, Arapin, Kulën, të gjithë lojtarë për të luajtur që në momentin e parë në parket, ndoshta dhe të rinjtë Kupi e Baruti, e bën Tiranën e Ilo Kojës që sot të jetë “50/50” me Studentin, skuadër e cila në këtë periudhë ka vuajtur dhe dëmtimet, ndërsa nuk është ende 100 % të formës së tij një lojtar i domosdoshëm si Memia.

Mundet të japin nga një dorë dhe Kasa me përvojën e tij, apo dhe Kristi Martiro, por duket se situata tek Studenti nuk e atillë për të besuar në një dominim total të kësaj skuadre ndaj Tiranës. Sidoqoftë, janë finale për t’u parë dhe që ia vlejnë të shihen, sepse përtej parashikimeve duket se edhe sivjet do të kemi pesë ndeshje Studenti-Tirana për të shpallur “kampionen”.

Kampionati Kombëtar

i Volejbollit – Meshkuj

Programi i finaleve të “play-off”-it

për titullin “kampion”

Meshkuj

21 prill                        Studenti – Tirana                 ora 19:00

24 prill                        Tirana – Studenti                 ora 19:00

27 prill                        Studenti – Tirana                 ora 19:00

30 prill                        Tirana – Studenti                 ora 19:00

(nëse do të jetë e nevojshme)

3 maj               Studenti – Tirana                 ora 19:00

(nëse do të jetë e nevojshme)