ASNN – Erzeni udhëhoqi kampionatin gjatë gjithë sezonit dhe ishte shfaqur si pretendenti kryesor për titullin, por formula e garës nuk ia lejonte të festonte para kohe. Dhe koha tregoi se “ujqërit e vjetër” shfaqin veten në momentet finale. Një i tillë është Partizani me trajnerin Ylli Tomori, i cili eliminoi nga “play-off”-i pikërisht Erzenin e Shijakut, të cilin e mundi në të dyja ndeshjet gjysmëfinale dhe për pasojë Partizani u bë finalisti i parë i kësaj faze, duke qenë njëherësh pretendent për të fituar trofeun.
Ndeshjen e fundit ndaj Erzenit, të kuqtë e Partizanit e fituan me rezultatin 3-1. Kishin fituar në ndeshjen e parë me rezultatin 3-2 në Sallën Sportive “Dhimitraq Goga” dhe me shifrat 2-0 kthejnë Erzenin në shtëpi dhe shkojnë vetë në finale. Duke folur për ndeshjen e fundit dhe suksesin e arritur, pra kalimin në finale, trajneri i mirënjohur, Ylli Tomori, u shpreh se tani skuadra e tij do të tentojë trofeun. Natyrisht, optimizmi i tij lidhjet me gjendjen e grupit.
Por edhe faktin se nga gara për titullin doli një prej kundërshtarëve kryesorë e më të vështirë. “E dinim që do të ishte një ndeshje e vështirë, – tha pas takimit trajneri i Partizani Ylli Tomori, – sepse kjo përballje ishte një finale e parakohshme. Ne këtë ndeshje e kishim vlerësuar maksimalisht dhe dëshironim që ta mbyllnim që sot, për të mos i dhënë mundësi rivalit. Skuadra ime ishte e mobilizuar dhe luajti në nivel maksimal, duke siguruar kalimin në finale.”
“Tani ne do të tentojmë ta fitojmë trofeun, edhe pse e dimë që kushdo që të shkojë në finale nga dy rivalët e tjerë do të jetë e vështirë për ne”, – ka përfunduar trajneri i Partizani Ylli Tomori.
