Studentit në volejboll për meshkuj i ka dalë “shkuma” për të mundur Elbasanin. Me vetëm 6 lojtarë, por me tre pika shumë të forta në sulm si Agushi, Bakiri e Gashi, gjithnjë nën dirigjimin e Kallajxhiut, skuadra e trajnerit Fisnik Lushnjari duhet të kishte marrë më shumë se sa një set. Studenti i homologut Arben Sako e ka marrë disi lehtë ndeshjen, ndërsa elbasanasit nisin të shkëputen që në fillim të setit të parë 5-8, 13-16, 13-18, 16-22, 19-23, 23-24 dhe në fund 23-25.

Mirëpo vetëm kaq, sepse më pas Studenti merr frenat e lojës në dorë dhe diferencat janë të dukshme teksa ka marrë tre sete radhazi 25-15, 25-17 dhe 25-13. Sigurisht që Sako ka pasur dhe pakënaqësitë e tij, ndërsa Barutin e ka futur në setin e parë, të cilin e humbi, dhe më pas e ka lënë jashtë loje. Për t’u evidentuar është fakti që në pikët e fundit të setit të katërt, ndërsa ishte në shërbim ka luajtur dhe Çullhaj për Studentin, që vinte nga dëmtimi.

Pikëshënuesi më i mirë i ndeshjes është Xhabrahimi me 20 pikë i ndjekur nga Agushi i Elbasanit me 19 pikë, Rama i Studentit me 17 pikë dhe Bakiri i Elbasanit me 15 pikë. Në bllok ka dalë fitues Pepa i Studentit me 5 mure fituese, si dhe Rama i Studentit me tre mure fituese. Kurse në shërbim me nga një të tillë Sejati, Xhabrahimi, Rama, Lundra të Studentit dhe Kallajxhiu, Agushi e Bakiri të Elbasanit.

Në total, në 4 sete Studenti ka shënuar 98 pikë, prej të cilave 71 pikë vetë, kurse 27 pikë kanë ardhur nga gabimet e Elbasanit. Në anën tjetër, Elbasani, në 4 sete ka shënuar 80 pikë, prej të cilave 53 pikë vetë, kurse 27 pikë kanë ardhur nga gabimet e Studentit, që kështu është lodhur për të mundur verdheblutë. Në ndeshje ka pasur dhe një moment tensioni mes Pepës dhe Kallajxhiut, që është zgjidhur nga të dy trajnerët, por dhe gjyqtari kryesor Enri Zenullari, i cili ka këshilluar lojtarin e Studentit për më shumë qetësi. Në fund gjithçka përfundoi paq.

Studenti – Elbasani              3-1

(23-25, 25-15, 25-17, 25-13)

Studenti: Sejati, Xhabrahimi, Rama, Baruti, Kupi, Bërdufi (L), Kula / Lundra, Pepa, Muça, Çullhaj. Trajner: A. Sako

Elbasani: Çeta, Kallajxhiu, Agushi, Gashi, Bakiri, Dulja, Kaçubina. Trajner: F. Lushnjari

Gjyqtarë: E. Zenullari, E. Dusha (Tiranë)

Kampionatit Kombëtar

i Volejbollit – Meshkuj

Java e 3-të

(14-15 tetor 2016)

Të premten:

Partizani – Vllaznia             3-0

Të shtunën:

Farka Volej – Skënderbeu 3-0

Studenti – Elbasani             3-1

Teuta – Tirana                      0-3

Erzeni                                                pushim

Renditja

Nr.       Skuadra         N.        F.         H.        Setet               Pikë

1. Partizani        3          3          0          9-1                  9
2. Farka Volej    3          3          0          9-2                  9
3. Studenti         3          3          0          9-2                  9
4. Erzeni                        2          2          0          6-0                  6
5. Tirana             3          1          2          5-6                  3
6. Elbasani        2          0          2          1-6                  0
7. Vllaznia         2          0          2          1-6                  0
8. Teuta              3          0          3          1-9                  0
9. Skënderbeu  3          0          3          0-9                  0