Arbër Troka është përsëri vendimtar për djemtë e Ylli Tomorit, ndërsa bardheblutë janë paraqitur me shumë luhatje në lojë, aq sa dhe Ferhati e ka pasur të vështirë të bëjë diferencën. Të dielën finalja e dytë. Seti i parë ka nisur i shpejtë për Studentin, që kryeson 8-5, 14-8, 16-13, 20-15, 22-19 dhe 23-20. E kur pritej që kampionët ta mbyllnin këtë set në favorin e vet, Tirana kthen.
Dhe arrin të përmbysë e të barazojë në 24-24. Mirëpo vetëm kaq, sepse dy pikët e fundit të setit të parë janë shënuar nga Studenti, që ka fituar 26-24. Nën këtë ritëm Studenti nis dhe setin e dytë dhe kryeson deri në 12-11. Përmbys Tirana, e cila në pushimin e dytë teknik është në epërsi 14-16, të cilin e ruan deri në fund 19-22, 22-24 dhe në fund 23-25.
Vetëm kaq për bardheblutë, një shkundje e fortë dhe totale e Tomorrit ndaj skuadrës së tij, e cila ka dhënë efektet e veta. 5-0, 8-1, 16-10, 18-13, 23-16 dhe në fund 25-17. Ka një tentativë për të mos e dorëzuar ndeshjen nga Tirana, madje për ta çuar atë në setin final, teksa në të katërtin ka kryesuar 1-4, 3-8. Por barazon Studenti në 12-12 dhe më pas del në epërsi 16-14, 22-18.
Dhe në fund 25-19 e 3-1 në një ndeshje të mirë, jo plotësisht shumë e mirë, e kampionëve në fuqi. Pikëshënuesi më i mirë i ndeshjes është Arbër Troka i Studentit me 27 pikë i ndjekur nga Klodian Ferhati i Tiranës me 23 pikë. Në bllok ka dalë fitues Pepa i Tiranës me shtatë mure fituese i ndjekur nga Malaj i Studentit me katër të tilla, si dhe Ledio Martiro dhe Ivanov të Studentit, apo dhe Ndoni i Tiranës me 3.
Në shërbim është dalluar Ledio Martiro i Studentit me katër rezultative pasuar nga Çali e Troka me tre, apo dhe Kasa e Ivanov me dy. Në total në katër sete Studenti realizoi 99 pikë prej të cilave 77 pikë vetë, kurse 22 pikë kanë ardhur nga gabimet e Tiranës. Në krahun tjetër Tirana në katër sete kishte 85 pikë në total prej të cilave 69 pikë vetë, kurse 16 pikë kanë ardhur nga gabimet e Studentit, që kësisoj hapin e parë e ka pasur të sigurt drejt mbrojtjes së titullit kampion në volejboll për meshkuj.
Studenti – Tirana 3-1 (1-0)
(26-24, 23-25, 25-17, 25-19)
Studenti: Çali, Malaj, L. Martiro, Gorenxa (L), Kasa, Troka, Ivanov / Tukseferi, Muça, Memia, Kono. Trajner: Y. Tomorri
Tirana: Ferhati, Lundra, Pepa, Ndoni, Rama, Xhija, Kasemi (L) / Xhabrahimi, Batalli, Arapi, Kula. Trajner: I. Koja
Gjyqtarë: Ko. Gjoka, E. Zguri (Tiranë)
Ndihmës: A. Nurja, E. Papamihali, A. Brokaj (Tiranë), R. Ekmekçiu (Elbasan)
