Volejbollisti veteran: “Në fillim të sezonit na është dëmtuar Lundra. Më pas Vuldijev dhe tani unë e të gjitha këto situata nuk janë në të mirë të skuadrës. Sigurisht që edhe kundërshtarët janë forcuar, por përsëri do jemi “kampion”.”

Blerim Memia, volejbollisti i Studentit, pranon që dëmtimet janë problemi më i madh i kampionëve në fuqi për këtë sezon. Ja dhe intervista e Blerim Memisë për “Sport Ekspres”.

– Dy humbje radhazi me dy rivalë për titull “kampion”. Atëherë çfarë po ndodh me Studentin?

– Unë mendoj se dëmtimet janë problemi kryesor për ne. Së pari është dëmtuar Genti Lundra në fillim të sezonit, që për ne ishte një humbje e rëndësishme. Po kështu tani na është dëmtuar dhe Vuldijev. Dhe tani edhe unë. E gjithë kjo situatë dëmtimesh ndikon edhe në rezultatet e skuadrës. Por nuk duhet të mohojmë që janë forcuar dhe kundërshtarët dhe këtë nuk e mohojmë dot. Vetëm se dëmtimet po na prishin punë.

– Përmendet Vuldjevin, për hir të së vërtetës një humbje e madhe për Studentin në kulmin e sezonit…

– Duhet të pranojmë që ishte lojtar i rëndësishëm, ashtu sikurse janë të gjithë pjesëtarët e skuadrës sonë. Mirëpo Studenti kishte kapur një ritëm të caktuar, të cilin ishim të bindur se do ta mbanim edhe në vazhdimësi. Por siç thash ndikuan keq dëmtimet. Shpresojmë që ta kalojmë këtë situatë

– Vllaznia, Tirana dhe Farka Volej, kujt i frikësoheni më tepër në “play-off”?

– Të tre këto kundërshtar, shto dhe Studentin, janë të denjë në luftën për titull kampion. Ne do të përpiqemi që të bëjmë lojën tonë dhe të jemi përsëri ne kampion. Dhe për këtë jemi të bindur.

– Të shtunën përballë Farka Volejit, si e parashikoni?

– Ndeshje e fortë. Besojmë shumë se do të kthehemi tek sukseset dhe të lëmë pas edhe dëmtimet. Për fatin e keq unë nuk jam as në këtë ndeshje duke shpresuar që do të jem i gatshëm për ekipin të paktën në fazën play-off. Megjithatë mendoj se kemi mundësi për të fituar?

– Së fundi, kombëtarja?

– Më mirë të mos flas për këtë çështje, sepse nuk ia vlen…