Tirana në volejboll për meshkuj ka bërë fitoren e saj më spektakolare të këtij sezoni, teksa ka mundur dje në mbrëmje në Sallën Sportive “Fahrie Hoti” në kryeqytet, Studentin thellësisht 3-0. Një rezultat i pabesueshëm dhe që duhet kërkuar nëpër blloqet e statistikave të volejbollit shqiptar për ta gjetur se kur ka ndodhur për herë të fundit. Sepse zakonisht një rezultat të tillë e ka pasur më së shumti Studenti ndaj Tiranës, ndërsa bardheblutë kanë fituar gjithnjë në raste të veçanta me set final. Por dje ka qenë një e mërkurë në mbrëmje ndryshe për bardheblutë.

Të motivuar në maksimum, duke mos lëshuar në asnjë drejtim, të besuarit e Ilo Kojës kanë mbyllur çdo shteg për të përmbysur rezultatin Studenti. E vërteta është Tirana vazhdon të luajë me të njëjtët lojtarë që në fillimin e sezonin. E si të tillë kanë mbërritur në këtë fitore spektakolare sepse e njohin dhe e gjejnë mirë njëri-tjetrin. Gjithnjë nën regjinë e Xhijës, por dhe të papërmbajtshmit Klodian Ferhati, të cilët së bashku me Ramën, Batallin, Pepën, Kulën, Arapi, Xhabrahimin, Lundrën dhe Barutin, ky i fundit një i ri i futur me guxim nga trajneri Koja, kanë krijuar një Tiranë të cilën ta kishte ënda ta shihje në parket.

Çfarë ndodh me Studentin? E vërteta është se dëmtimi i Vuldijevit, që tashmë dihet se e ka humbur sezonin, ka krijuar pështjellim në formacionin e Ylli Tomorrit. Sepse sot Troka, Ivanov dhe Malaj duket se janë pak për të mbajtur ritmin e vendit të parë dhe të kryesuese. Në kushtet kur Memia, Qerraxhija, apo dhe Kono, po pse jo dhe Kristi Martiro, të lënë për një kohë të gjatë dhe pa luajtur, tashmë e kanë të vështirë të gjejnë atë ritëm që kërkon Studenti sot. Për fat ishte një ndeshje kampionati dhe është e natyrshme që kampionët në fuqi do të jenë përsëri të fortë.

Por humbja e djeshme me Tiranën djeg më shumë sepse ka ndryshuar të gjithë situatën e kreut, ndërsa Studenti gdhin në vendin e tretë e Vllaznia kryesuese.

Kampionati Kombëtar

i Volejbollit – Meshkuj

Java e 17-të

(23 mars 2016)

Vllaznia – Skënderbeu       3-0

Farka Volej – Elbasani        3-0

Tirana – Studenti                 3-0

Teuta                                      pushim

Renditja

Nr.       Skuadra         N.        F.         H.        Setet               Pikë

1. Vllaznia         15        11          4        37-20              33
2. Tirana             15        10          5        35-17              32
3. Studenti         14        11          3        35-17              31
4. Farka Volej    14          9          5        31-20              26
5. Teuta              14          8          6        30-25              23
6. Skënderbeu  15          2        13          9-40                6
7. Elbasani        15          0        15          7-45                2