21:47 ka qenë ora kur ka rënë vërshëllima përfundimtare e ndërkombëtarit Arjan Shehu, që ka shënuar mbylljen e ndeshjes Farka Volej-Elbasani. Plot 8 orë e 47 minuta volejboll, plot 15 sete të luajtura në 4 ndeshje, dy meshkuj dhe dy femra, e strapacimi mbi të gjitha për punëtorët e Pallatit të Sportit “Asllan Rusi” dhe forcat e rendit, të cilat kanë ardhur që në mesditë në impiantin kryesor të shumësportëve në Tiranë, ka qenë i tejskajshëm.

Sepse të shtunën është bërë dhe mundje në atë impiant, por në mbrëmje është luajtur dhe basketboll për meshkuj. Nëse do të kishte një menaxhim më të mirë të klubeve, por dhe Federatës Shqiptare të Basketbollit dhe asaj të Volejbollit për të mos i përqendruar të gjitha ndeshjet në të njëjtën ditë, atëherë të gjithë do të kishin ikur me kohë në shtëpitë e tyre. Sepse si Farka Volej, ashtu dhe Elbasani do të mund të kenë pritur për gati dy orë e gjysmë derisa të përfundonte Partizani-Tirana për femra.

Pasi volejbolli nuk ka “kaull”, aq më tepër që vetëm Barleti Volej-Teuta ka shkuar me pesë sete. Duke mbetur tek ndeshja e Farkës, së cilën nuk e kanë ndjekur më shumë se sa 20 vetë, djemtë e Dritan Bardhit kanë mbaruar punë shpejt për një orë, ndërsa ka fituar 3-0, me rezultatet e seteve përkatësisht 25-17, 25-17 dhe 25-13.

Farka Volej – Elbasani         3-0

(25-17, 25-17, 25-13)

Farka Volej: Deliu, Koçi, Qepa, Metani, Lundra, Bajrami, Vllaçaj (L) / Topçiu (L), Nimani, Xhajkone, Dodaj. Trajner: D. Bardhi

Elbasani: Çeta, Kallajxhiu, Agushi, Bakiri, Gashi, Dulja, Kaçubina (L) Trajner: F. Lushnjari

Gjyqtarë: A. Shehu, E. Dusha (Tiranë)

Kampionati Kombëtar

i Volejbollit – Meshkuj

Java e 5-të

(28-29 tetor 2016)

Të premten:

Studenti – Erzeni                 3-2

Të shtunën:

Tirana – Skënderbeu          3-0

Teuta – Vllaznia                   0-3

Farka Volej – Elbasani        3-0

Partizani                                pushim

Renditja

Nr.       Skuadra         N.        F.         H.        Setet               Pikë

1. Partizani        4          4          0          12-1                12
2. Farka Volej    5          4          1          13-5                12
3. Studenti         4          4          0          12-4                11
4. Tirana             5          3          2          11-7                  9
5. Erzeni                        4          2          2            9-6                  7
6. Vllaznia         4          2          2            7-7                  6
7. Skënderbeu  5          1          4            3-13                3
8. Elbasani        4          0          4            1-12                0
9. Teuta              5          0          5            2-15                0