Farka Volej e ka mundur Tiranën jo vetëm me lojë, por dhe me tifozëri. Mbi 300 vetë kanë mbështetur Farkën me daulle dhe me thirrje e kur është shënuar pika e 16-të e setit të 5-të, e cila i ka dhënë fitoren e gjysmëfinales skuadrës së trajnerit Dritan Bardhi, kanë hyrë të gjithë në fushë dhe kanë festuar me lojtarët. Sepse për ta, për atë që kanë dhënë në fushën e lojës, janë me plot gojë “heronj”. Dhe sot në finale përballë Studentit pritet të jetë një Pallat Sporti më i mbushur se kurrë.
Në setin e parë Farka Volej, falë lojës së Koçit dhe Qepës, arrin të shkëputet deri në 16-19. Mirëpo Tirana di ta kthejë lojën dhe kryeson 20-19. Por vihet në ekuilibër e gjithë loja 22-22, 23-23, 24-24, 25-25. Dhe në fund Tirana shënon dy pikët e fundit dhe merr setin 27-25. E fillon bindshëm lojën Tirana në setin e dytë, teksa kryeson 4-1 dhe 12-10. Por Farka arrin të kthejë dhe e vë nën kontroll lojën. Udhëheq 16-19, 16-21, 18-23 dhe në fund 20-25. Bardheblutë i përdorin të gjithë lojtarët e stolit.
Dhe për rrjedhojë në setin e tretë janë në epërsi në pushimin teknik 12-10. Por Farka nuk dorëzohet, ndërsa sërish kthen në 17-18, 17-20, 19-24 dhe në fund fiton 22-25. Seti i katërt ka nisur keq për bardheblutë, aq sa Sako detyrohet të marrë pushim në disavantazhin 8-3 për Farkën. Dhe në fakt Tirana ka kthyer 12-11, 16-12, 20-14, 23-21 dhe në fund 25-23. Tashmë në finale. E nis Tirana mirë deri në 4-3, kthen Farka në 5-7. Dhe me epërsinë 8-7 për bardheblutë ndërrohen fushat.
11-9 për Tiranën, 11-11, 14-14 dhe dy pikët e arta të Farka Volejit i japin fitoren 3-2 kësaj skuadre dhe daljen për herë të parë në finalen e Kupës së Shqipërisë. Pikëshënuesi më i mirë i ndeshjes është Koçi i Farka Volejit me 22 pikë, i ndjekur nga Ferhati me 20 pikë, si dhe Qepa 15 pikë dhe Pashkin 14 pikë. Në bllok kanë dalë fitues me nga 5 mure fituese Koçi e Qepa. Kurse në shërbim është i saktë me 5 rezultative Koçi.
Pra parë kështu njeri i ndeshjes për Farka Volejin është Redi Koçi që në total ka shënuar 32 pikë (22 me sulm, 5 me bllok, 5 me shërbim). Në 5 sete Tirana ka shënuar 108 pikë, prej të cilave 80 vetë, kurse 28 pikë kanë ardhur nga gabimet e Farka Volejit. Në krahun tjetër Farka Voleji ka shënuar 104 pikë, prej të cilave 78 vetë, kurse 26 kanë ardhur nga gabimet e bardhebluve. Dhe në fund Farka Voleji është në finale.
Tirana – Farka Volej 2-3
(27-25, 20-25, 22-25, 25-23, 14-16)
Tirana: Xhija, Pashkin, Ferhati, Medenica, G. Lundra, Kola (L), Xhabrahimi / Pepaj, Ndoni, Rama, A. Lundra. Trajner: A. Sako
Farka Volej: Deliu, Koçi, Bajrami, Nimani, Metani, Qepa, Bërdufi (L) / Vllaçaj, Palushi (L), Seferi. Trajner: D. Bardhi
Gjyqtarë: E. Mujo, T. Zguri (Tiranë)
Asistentë: E. Zenullari, E. Braho (Tiranë)
