ASNN – Skënderbeu në volejboll për meshkuj nuk di të fitojë aq më tepër me skuadrat që ka sipër vetes, ku gjatë gjithë sezonit vetëm është dorëzuar. Edhe dje korçarët kanë bërë të njëjtën gjë, teksa Farka Voleji arriti një fitore të pastër 3-0 në Pallatin e Sportit “Tamara Nikolla” në ndeshjen që nisi në orën 14:00.
Tre sete lojë që kanë zgjatur jo më shumë se 60 minuta, teksa duhet thënë se që në setin e parë miqtë kryesojnë 2-7, 5-10 dhe më pas 11-19 dhe krejt seti përfundon 17-25 në favor të Farka Volejit. Edhe seti i dytë ka pothuajse të njëjtën pamje, madje është më i lehtë për miqtë, që kryesojnë që në fillim 1-5, 4-12 dhe me radhë deri në rezultatin përfundimtar 16-25.
0-2 për Farka Volej me sete bëri që miqtë të lëshojnë disi dhe në setin e tretë ka disi rivalitet, ku disa herë rezultati është barazuar 11-11, 15-15 dhe 19-19. Por në fund Farka Volej tregohet më e saktë dhe e fiton edhe këtë set 22-25. Si përfundim Skënderbeu humbet në shtëpi 0-3 dhe mezi pret fundin e këtij viti, pasi duket se e ka të vështirë këtë sezon.
Farka Volej me këtë fitore siguron edhe tre pikë të tjera në Korçë, tre pikë më shumë se të lehta, që i japin më shumë siguri për të konsoliduar vendin e katërt, që të çon në “play-off”-in për titull “kampion”.
Skënderbeu – Farka Volej 0-3
(17-25, 16-25, 22-25)
Skënderbeu: Haxhillari, Caci, Ndardhari, Musaka, Jatagani, Shëllira, Shishi (L), Millanji (L) / Dhimitri, Beqiri, Lumani. Trajner: A. Prifti
Farka Volej: Deliu, Koçi, O. Qepa, Metani, Bajrami, Mimani, Bërdufi (L), Topçiu (L) / Xhajkone, E. Qepa, Doda. Trajner: D. Bardhi
Gjyqtarë: E. Dusha, R. Mujo (Tiranë)
Kampionati Kombëtar
i Volejbollit – Meshkuj
Java e 18-të
(30 mars 2016)
Skënderbeu – Farka Volej 0-3
Studenti – Vllaznia 2-3
Teuta – Tirana 3-2
Elbasani pushim
Renditja
Nr. Skuadra N. F. H. Setet Pikë
- Vllaznia 16 12 4 40-22 35
- Tirana 16 10 6 37-20 33
- Studenti 15 11 4 37-20 32
- Farka Volej 15 10 5 34-20 29
- Teuta 15 9 6 33-27 25
- Skënderbeu 16 2 14 9-43 6
- Elbasani 15 0 15 7-45 2
