ASNN – Volejbollistët e Erzenit mposhtën ata të Ferizajt me rezultatin 3-0 dhe ndeshja që u luajt të shtunën në Arenën Sportive “Dhimitraq Goga”, shënoi fillimin e turneit “Gjergj Kastrioti”. Ky është një veprimtari e përbashkët e ekipeve nga Shqipëria dhe Kosova që po zhvillohet për herë të parë. Fillimisht “Gjergj Kastrioti” është organizuar në formë turneu.
Edicioni është edhe testues, ndërsa plani është që në vjeshtë të fillojë liga e përbashkët e ekipeve nga Shqipëria dhe Kosova. Për turneun nismëtar, dy vendet shqiptare përfaqësohen me nga dy ekipe të femrave dhe dy të meshkujve. Janë përzgjedhur ekipet më të mira të gjysmës së parë të sezonit dhe fundjavën e shkuar u luajtën ndeshjet e para.
Tek meshkujt është luajtur edhe takimi tjetër, Peja-Tirana, të cilën skuadra e kryeqytetit të Shqipërisë e fitoi me shifrat 3-1. Tek femrat, Fer Volley fitoi 3-2 ndaj Skënderbeut të Korçës, në ndeshjen që u luajt në Ferizaj. Ndërkohë, Tirana fitoi 3-1 ndaj Dritës së Gjilanit, në duelin që u luajt në Sallën Sportive “Fahrie Hoti” në kryeqytetin shqiptar.
Fundjavën e ardhshme zhvillohen ndeshjet e kthimit gjysmëfinale dhe skuadrat më të suksesshme pas dy ndeshjeve avancojnë në finale. Tashmë është duke u zhvilluar Liga Unike në basketboll. Kjo ligë zhvillohet si për femra, ashtu edhe për meshkuj. Në basketboll këtë edicion luhet ligë e rregullt, ndërsa edicioni i parë, vjet, ishte në formë turne, i ngjashëm me atë në volejboll aktualisht.
Ka shumë vjet që kohë pas kohe aktualizohet ideja për një ligë të përbashkët në futboll. Por deri më tani, nuk është bërë ndonjë hap dhe krijimi i saj i shpejtë duket pak i mundshëm. Ndërkohë, në hendboll vlerësohet i pamundur krijimi i një lige të përbashkët. Hendbolli në Shqipëri është në nivel të thellë amator.
