ASNN – Skuadra e Tiranës në volejboll për femra, Tirana, mori një fitore me vlera në kuadër të javës së 8-të të kampionatit kombëtar të Kategorisë së Parë, Grupi A, pasi mposhti bindshëm Vllazninë me rezultatin 3-1. Ishte një ndeshje ku vajzat shkodrane fituan vetëm setin e dytë, kurse setet e tjera i dominoi me meritë Tirana. Kështu, vajzat bardheblu fituan setin e parë me shifrat 25-20, duke qenë gjatë gjithë kohës në epërsi dhe realisht e qartë në veprimet e tyre.
Duket se Tirana kishte bërë një fazë përgatitore cilësore dhe vajzat ishin me moral të lartë. Megjithatë, në setin e dytë shkodranet barazojnë 1-1, sepse e fitojnë setin me shifrat 25-21. U duk se loja mori një rrjedhë të papritur, por për të larguar hijet e dyshimit menduan vajzat kryeqytetase, të cilat e fituan setin e tretë me shifrat e thella 25-14. Vllaznia rivalizoi fort në setin e katërt dhe tentoi ta fitonte atë për ta cuar ndeshjen në setin final, por nuk ia doli.
Tirana e fitoi dhe këtë set me shifrat 25-23 dhe krejt ndeshjen me rezultatin 3-1, duke marrë pikë të çmuara për renditjen. Me fitoren e djeshme ndaj Vllaznisë, Tirana shkon në kuotën e 18 pikëve, një më shumë se Partizani i vendit të katërt. Me këtë kuotë pikësh Tirana i bën presion Barletit Volej që ka 19 pikë, e pse jo dhe Mirditës që ka 21 pikë. Pra gara për titullin në këtë kategori është e hapur dhe mund të ketë surpriza në javët në vijim.
Tirana – Vllaznia 3-1
(25-20, 21-25, 25-14, 25-23)
Kampionati Kombëtar
i Volejbollit – Femra
Grupi A1
Java e 8-të
E shtunë, 9 shkurt 2019:
Teuta – Lushnja 3-0
Skënderbeu – Partizani 0-3
Mirdita – Barleti Volej 3-2
Tirana – Vllaznia 3-1
Renditja
Nr. Skuadra N. F. H. Setet Pikë
- Mirdita 8 7 1 23-6 21
- Barleti Volej 8 6 2 22-9 19
- Tirana 8 6 2 20-8 18
- Partizani 8 6 2 19-9 17
- Teuta 8 3 5 10-16 9
- Skënderbeu 8 2 6 7-19 6
- Vllaznia 8 2 6 8-21 5
- Lushnja 8 0 8 2-24 1
