ASNN – Nuk pati shumë histori në derbin e kryeqytetit, të vlefshëm për gjysmëfinalet e 70-vjetorit të Kupës së Federatës në Volejboll për Femra. Ndërsa bardheblutë, me shumë përforcime si: Shkurti, Nezaj, Esmeralda Tuci apo edhe Remina Meta, luajtën me gjithë armatën titullare, Partizani zgjodhi ekipin e moshave duke mos e marrë seriozisht këtë veprimtari.

Që në ballafaqimin në nisje nuk kishte dyshime se Tirana do ta kishte shumë të lehtë kualifikimin dhe më tepër u duk si miqësore sesa zyrtare. Tirana shkëputet shpejt 7-0 duke mos u dhënë asnjë mundësi të rejave të Partizanit. Përballë përvojës e shtatlartësisë së bardhebluve me Shkurtin e rikthyer pas një viti pushim, Partizani shënoi pikën e parë, pasi Tirana udhëhiqte 19-0.

Më tepër një dhuratë e Nezajt pas një faulli, sesa meritë e rivaleve modeste. Ky set mbyllet 25-3. Të njëjtën tablo servirin edhe dy setet e ardhshme ku Tirana kërkoi ta mbyllte sa më herët sfidën dhe fitoi 25-6, 25-3, duke e fituar të gjithë takimin me rezultatin 3-0 dhe duke siguruar vendin në finalen e madhe, ku përballë do të ketë rivalen e madhe, Barleti Volejin.

Kupa e 70-vjetorit të

Federatës Shqiptare të Volejbollit

Femra

Gjysmëfinalet

(20 tetor 2015)

Tirana – Partizani                3-0

(25-3, 25-6, 25-3)

Barleti Volej – Teuta            3-0

(25-15, 25-13, 25-16)

Finalja

(22 tetor 2015)

Tirana – Barleti Volej            ora 16:00

Meshkuj

Gjysmëfinalet

(21 tetor 2015)

Tirana – Teuta                      ora 16:00

Studenti – Vllaznia              ora 18:00

Finalja:

Më 22 tetor 2015                  ora 18:00