ASNN – Trajneri i Partizanit në volejboll për femra, Roland Tarja, nuk e fshehu kënaqësinë e tij për fitoren e skuadrës së kuqe në duelin final derbi me Tiranën (3-0), duke thënë se kjo fitore ishte një nisje e mirë dhe një nisje e tillë e mbarë është gjysma e punës.

“Jam shumë i lumtur për fitoren, – u shpreh trajneri i Partizanit, Ronald Tarja, – pasi luanim ndaj një kundërshtari shumë të vështirë dhe në fushën e tij. E të fitosh në palestrën e Tiranës nuk është e lehtë. Edhe pse rezultati është 3-0, ndeshja në vetvete ishte e bukur dhe me rivalitet, gjë që prodhoi emocione.”

“Duelet derbi, për më tepër në finale, janë gjithmonë të paparashikueshme, prandaj fitorja jonë merr vlerë. Nuk e filluam takimin ashtu siç duhej, – vijoi trajneri Tarja, – por në momentet kyçe të setit të parë ishim mjaft të qartë në veprimet taktike. Dy setet e tjera ishin të bukura dhe të luftuara deri në fund.”

“Dihet që fillimi i mbarë është gjysma e punës dhe shpresoj që në duelin tjetër të kemi mbështetjen e sportdashësve tanë. Me përkrahjen e tyre mund t’ia dalim me sukses”, – ka përfunduar trajneri i Partizanit, kampione në fuqi në volejboll për femra, Roland Tarja.