ASNN – Fantastike! Shqipëria e volejbollit të femrave ka përmbysur Austrinë, ndërsa ka fituar në Ens 3-2, ndërsa kështu skuadra e drejtuar nga trajneri Altin Martiri ka “salduar” vendin e dytë dhe njëkohësisht daljen në 4-shen finale të Ligës së Argjendtë të Evropës, që më 16 dhe 17 2018 qershor do të zhvillohet në Nykoping të Suedisë. Austria ka fituar dy sete radhazi, 25-21 dhe 25-22.
Por vajzat kuqezi nuk dorëzohen. Fitojnë setin e tretë 19-25, teksa kanë kryesuar 5-8, 13-16, 17-21. Po kështu të katërti 16-25, ndërsa janë gjithnjë në udhëheqje të rezultatit; 6-8, 10-16, 13-21. E ndërkohë seti final ka nisur mirë për Austrinë, që ka kryesuar 5-1. Por shpejt përmbysin vajzat tona në 7-10, 9-12 dhe në fund 11-15. Pikëshënuesja më e mirë dhe lojtarja më e mirë e ndeshjes ka qenë Erblira Bici e Shqipërisë me 32 pikë.
Ajo është ndjekur nga Holzer dhe Kristianska të Austrisë me 18 pikë, si dhe Markoviç e Austrisë me 16 pikë. Në bllok ka dalë fituese Malvina Tuci e Shqipërisë me 5 mure të suksesshme, e ndjekur nga Marosh e Austrisë me 4 dhe Holzer po e Austrisë me 3. Në shërbim, Shmid e Austrisë dhe Marina e Shqipërisë me 3. Ka festë tek vajzat kuqezi, kurse ndeshja me Gjeorgjinë do të jetë thjeshtë për të mbyllur Eliminatoret e Ligës së Evropës, sepse tashmë finalja është e garantuar.
Austri – Shqipëri 2-3
(25-21, 25-22, 19-25, 16-25, 11-15)
Austria: Holzer, Kristianska, Marosh, Markoviç, Shmid, Nesimoviç, Valner (L), Epure (L) / Duvnjak, Tofël, Bajde, Daisl. Trajnere: S. Iliç
Shqipëria: Bici, E. Tuci, Marina, Arjola Prenga, Thaka, Amarilda Prenga, Sejfullai (L), Shehi (L) / Xheka, Kushi, M. Tuci. Trajner: A. Martiri
Gjyqtarë: I. Shimpl (Slloveni), H. Sodja (Austri)
Liga e Argjendtë e Evropës 2018
Volejboll – Femra
Grupi B
Renditja
Nr. Skuadra N. F. H. Setet Pikë
- Austria 5 4 1 14-5 13
- Shqipëria 5 4 1 12-6 11
- Gjeorgjia 5 1 4 5-12 3
- Izraeli 5 1 4 5-13 3
