ASNN – Tirana fiton derbin me Partizanin dhe pret biletën e fundit të vlefshme për finalen e kampionatit, ku do të gjejë përballë më datë 12 prill (të dielën) kampionen në fuqi të Barleti Volej. Në sallës sportive “Fahrie Hoti”, skuadra e drejtuar nga Gorenxa ka fituar me rezultatin 3-0 një ndeshje plot me emocione në parket.
Dy ekipet rivalizojnë që në fillim të setit të parë të takimit. Tirana krijon një diferencë të shkurtër në goditjet e para të lojës, por ish-lojtarja e bardhebluve, Xhixha, më e mira në parketpër Partizanin, arrin të ruajë ekuilibrat. Fundi i setit të parë është dramatik për vajza e drejtuara nga Roland Tarja.
Partizani “përkëdhel” fitoren teksa kryeson me rezultatin 24-20 në fund të setit. Të kuqve u mjafton vetëm një pikë për të fituar ndeshjen, por duket se nuk i kishin bërë mirë llogaritë me Amarilda Prengën, e cila është e “pathyeshme” duke realizuar tri pikë radhazi.
Partizani humbet besimin në vetvete, ndërsa Tirana shfrytëzon “përgjumjen” e kundërshtarit duke përmbysur gjithçka në shifrat 26-24. Fitorja e setit të parë i ka dhënë më shumë besim Tiranës, që ndryshe nga seti i kaluar, tek i dyti e kërkon më shumë fitoren dhe në fund triumfon me rezultatin 25-22. Seti i tretë është një formalitet.
TIRANA – PARTIZANI 3-0 (2-1)
(26-24, 25-22, 25-18)
TIRANA: Am. Prenga, E. Meta (l), Blloku, Thaka, Matraku, Pira, Hoxha, Agolli, Gega, Shehi (l). Trajner: A. Gorenxa
PARTIZANI: Xhixha, M.Tuci, Xheka, Reka, Shehu, Shaba,Baruti, Zeqirllari (l), Xhelilaj, Xhaferraj, Goxhaj, Shera, Agolli (l). Trajner: R. Tarja
GJYQTARË: E. Mujo, T. Zguri
Kampionati Kombëtar
i Volejbollit – Femra
Kalendari i “play-off”-it
Gjysmëfinalet
Ndeshja e parë
(2 prill 2015)
Të enjten:
Barleti Volej – Teuta 3-0
Salla 1, Pallati i Sportit “Asllan Rusi”, Tiranë
Tirana – Partizani 3-0
Salla Sportive “Fahrie Hoti”, Tiranë
Ndeshja e dytë
(5 prill 2015)
Të dielën:
Teuta – Barleti Volej 0-3
Pallati i Sportit “Ramazan Njala”, Durrës
Partizani – Tirana 3-1
Salla 1, Pallati i Sportit “Asllan Rusi”, Tiranë
Ndeshja e tretë*
(8 prill 2015)
Të mërkurën:
Tirana – Partizani 3-0
Salla Sportive “Fahrie Hoti”, Tiranë
* Nëse do të ishte e nevojshme
