ASNN – 10 ditët e ardhshme do të jenë 10 ditët më intensive, por mbase më historike për Arjola Prengën. Kjo për arsye se volejbollistja shqiptare është në prag të një arritjeje historike personale, por me klubin e saj norvegjez, Stod Volejin, që synon të arrijë në çerekfinale të veprimtarisë së dytë të klubeve të kontinentit, “Çellenxh Kap” (Challenge Cup).
Pasi ka kapërcyer në turin e parë holandezët e Sliedreht Sportit dhe në turin e 32-shes sllovenet e Kalcit Kamnikut, kampionia dhe fituesja në fuqi e Kupës së Norvegjisë përballet në turin e 16-shes me azeret e Azerreilit të Bakusë, apo thënë ndryshe skuadrës së Hekurudhave të Azerbajxhanit. Kjo e fundit pati nevojë për një “set të artë” për t’u kualifikuar në turin e 32-shes ndaj Volej Kënizit.
Duke folur ekskluzivisht për AlbanianSport.com në prag të sfidës së 14 janarit, 28-vjeçarja ka theksuar se skuadra e saj po punon fort në stërvitje dhe me skemat për të siguruar fitoren ndaj azereve. “Sigurisht që stërvitja është me ngarkesë të plotë, madje sot patëm edhe një seancë stërvitje në natyrë, por mos harroni se temperatura sot këtu ishte -11 gradë Celcius”, – rrëfen ajo, duke biseduar me ne nëpërmjet komunikimit elektronik.
“Skuadra jonë është e motivuar, por kundërshtari është një skuadër e fortë, – ka vijuar Arjola. – Do të jetë një ndeshje e fortë, të paktën nga ajo që kemi parë nëpërmjet pamjeve filmike. Nëpërmjet videove, kemi parë dhe studiuar një numër ndeshjesh të kundërshtarit dhe ajo që binte në sy ishte shtatlartësia e skuadrës azere, të paktën krahasuar me skuadrën tonë.”
Prenga e pohon se është parketi ai që sidoqoftë do të vendosë, duke theksuar se skuadra e saj shkon në këtë sfidë pa dy sportiste të rëndësishme, malazezen Nikoleta Peroviç dhe polaken Aleksanda Szhimanska. “Janë dy mungesa të rëndësishme dhe shpresojmë që të paktën t’i kemi për ndeshjen e kthimit”, – vijon volejbollistja shqiptare e skuadrës norvegjeze.
“Praktikisht na prishin shumë punë, sepse janë të dyja që mund të luajnë në formacion, – ka theksuar ajo. – Malazezja, e cila ka filluar stërvitjen, por ende nuk kërcen dot, është diagonaliste dhe rolin e saj do ta improvizojë braziliania Klarisë Benicia Peishoto, e cila në fakt ka luajtur në Francë në këtë pozicion. Por po të kishim dy diagonaliste do të bënim më shumë “luftë”.”
“Ndërsa polakja që ka dëmtuar gjurin, ishte qendër, por mund të luajte edhe diagonal”, – ka shtuar Prenga, e cila gjithsesi beson te skuadra e saj. Ndeshja e parë midis Stod Volejit dhe Azerreilit të Bakusë do të luhet më 14 janar në Norvegji, në Sallën Sportive “Stajnkjerholl”, duke nisur nga ora 19:00, dhe do të gjykohet nga gjyqtari kryesor, finlandezi Ari Jokelainen dhe hungarezja Helena Geldof.
Kurse ndeshja e kthimit luhet pas një jave, më 22 janar, në kryeqytetin e Azerbajxhanit, Baku, duke nisur nga ora 18:00 me orën lokale. Midis këtyre sfidave, Arjola Prenga dhe skuadra e saj do të diskutojnë finalen e Kupës së Norvegjisë me Oslo Volejit. Rivalja kryeqytetase, e cila e fitoi këtë trofe para dy vjetësh, kërkon të hakmerret për humbjen e pësuar në finalen e vjetshme.
