Të kuqet e Roland Tares kanë fituar dje me përmbysje me durrsaket, që në pikët shtesë kanë marrë setin e parë, më pas janë hije e vetvetes. Në setin e parë deri në pushimin e parë teknik gjithçka është në ekuilibër, ndërsa Partizani kryeson vetëm me një pikë diferencë, 8-7. Teuta është kthyer në lojë me mendje tjetër dhe në pushimin e dytë teknik është në epërsi 12-16.

Vijon të kryesojë skuadra e trajnerit Edmond Jazenxhiut deri në 19-21 e më pas përmbys Partizani, që është shumë pranë fitimit të setit kur kryesonte 24-22. Por pika nuk vjen. Teuta barazon në 24-24 dhe në bllokun vendimtar të Begiçit ka ardhur fitorja e setit 24-26. Durrsaket edhe në fillimin e setit të dytë janë në epërsi 0-4 dhe 5-8. Por vetëm kaq.

Partizani jo vetëm që ndryshon, por përmbys në 16-15. Dhe më pas kryeson 18-15, 20-16 dhe 25-18. Si në setin e tretë, ashtu edhe në të katërtin, që Partizani i ka fituar përkatësisht 25-19 dhe 25-18, të kuqet kanë qenë gjithnjë në udhëheqje të rezultatit. Ndaj dhe Partizani ka fituar me meritë 3-1 duke qenë tashmë në mbyllje të fazës së parë në vendin e dytë.

Pikëshënuesja më e mirë e ndeshjes është Pirra, e Partizanit, me 17 pikë, e ndjekur nga Tuci, e Partizanit, me 15 pikë, Blloku e Partizanit, me 14 pikë, si dhe Disha, e Teutës, me 10 pikë. Në bllok ka dalë fituese Tuci e Partizanit, si dhe Rexhepi e Begiçi të Teutës me 3 mure të suksesshme. Në shërbim kanë spikatur Matraku e Partizanit dhe Gashi e Teutës, me 4 rezultative secila.

Në total, në 4 sete, Partizani ka realizuar 99 pikë, prej të cilave 78 pikë vetë, kurse 21 pikë kanë ardhur nga gabimet e Teutës. Në anën tjetër, durrsaket, në total, në 4 sete kanë realizuar 81 pikë, prej të cilave 60 pikë vetë, kurse 21 pikë kanë ardhur nga gabimet e Partizanit. Pra një ndeshje e barabartë në pikët e falura, por që Partizanit e ka fituar me meritë.

Partizani – Teuta                   3-1

(24-26, 25-18, 25-19, 25-18)

Partizani: Pirra, Blloku, Matraku, Reka, Tuci, Gongo, Shehu (L) / Kole. Trajner: R. Tarja.

Teuta: Gashi, Rexhepi, Muka (L), Guza, Begiçi, Disha, Matoshi / Avdyli. Trajner: E. Jazenxhiu

Gjyqtarë: E. Dusha, A. Nurja (Tiranë)

Kampionati Kombëtar

i Volejbollit – Femra

Grupi A1

Java e 7-të

(12-14 nëntor 2016)

Të shtunën:

Barleti Volej – Vllaznia                    3-1

Lushnja – Elbasani                         3-0

Tirana – Skënderbeu                      3-0

Të hënën:

Partizani – Teuta                              3-1

Renditja

Nr.       Skuadra         N.        F.         H.        Setet               Pikë

1. Barleti Volej   7          7          0          21-3                20
2. Partizani        7          5          2          17-9                16
3. Teuta              7          5          2          18-8                15
4. Tirana             7          4          3          15-10              13
5. Vllaznia         7          4          3          13-14              10
6. Lushnja         7          2          5            9-17                5
7. Skënderbeu  7          1          6            7-19                5
8. Elbasani        7          0          7            1-21                0