Ashtu sikurse ishte parashikuar, dje është bërë grumbullimi i parë i kombëtares së femrave në volejboll, e cila do të drejtohet nga Altin Martiro dhe Roland Tarja. Shqipëria do të jetë pjesëmarrëse në Ligën e Evropës, ndërsa do të ketë përballë Poloninë, Bjellorusinë dhe Sllovakinë.
Nga data 3, deri më 5 qershor 2016 do të jetë në Poloni dhe nga data 17, deri më 19 qershor 2016, në Shqipëri. Dje në grumbullim, teksa lojtaret kanë bërë analizat mjekësore, si dhe testimet fizike, kanë munguar Molla dhe Peteza të Vllaznisë, si dhe Arjola e Adelajde Prenga e Romina Matoshi, që luajnë në Kosovë.
Por ndërkohë ka ardhur dhe lojtarja e lirë e Tiranës, Xhozafa Sejfullai. Në grumbullim kanë qenë të pranishëm trajneri Martiro, presidenti i Federatës Shqiptare të Volejbollit, Erlind Pëllumbi, si dhe mjeshtri i rrjetës shqiptare, Vangjel Koja. Nga Pëllumbi është mësuar se pjesë e kësaj kombëtareje do të jenë edhe lojtare që luajnë në Itali e Greqi.
Kurse Martiro ka bërë të ditur se do të zhvillohen ndeshje miqësore me Malin e Zi, Bosnjë-Hercegovinën dhe Greqinë si një mundësi përgatitjeje të mirë përpara Ligës së Evropës, e cila luhet në qershor.
