ASNN – Kryeqyteti nxjerr jashtë loje Mirditën dhe universitaret e Barletit, në finale klasikja Partizani-Tirana. Në finalen e “play-off”-it në volejboll për femra do të kemi një duel mjaft interesant e njëherësh një klasike të sportit shqiptar, dueli i madh Partizani-Tirana. Në fillim këto skuadra as mendoheshin se do të arrinin në finale, nisur nga dominimi i kampionatit prej Mirditës dhe Barleti Volej, skuadra që shiheshin favorite për titullin.
Por mrekullitë nuk janë thjesht të tilla sepse suksesi vjen në formë të papritur, por mrekullitë ndodhin pasi janë vetë rivalët që mundësojnë arritje suksesi të nivelit më të lartë dhe në volejbollin e femrave këtë e realizuan dy skuadrat e kryeqytetit, Partizai e Tirana. Vajzat e skuadrës së kuqe të trajnerit Roland Tarja eliminuan në gjysmëfinale skuadrën që udhëhiqte kampionatin në sezonin e rregullt, Mirditën, duke e mundur dy herë radhazi me të njëjtin rezultat, 3-2 me sete.
Ishte një kualifikim i papritur i Partizanit përballë një skuadre si Mirdita që kishte udhëhequr me meritë garën deri në këtë fazë finale. Por edhe më i papritur ishte dhe sukses i Tiranës, e cila eliminoi një tjetër pretendente, Barleti Volejin. Në fillim fituan vajzat universitare, ndeshjen e parë, por në dy takimet e tjera “ligjin” e bëri Tirana, që me rezultatin 2-1 me fitore ia doli të kualifikohet në finalen e madhe të “Play-off”-it për titull.
Për vajzat e trajnerit Ardian Gorenxa ishte padyshim një sukses i madh dhe Tirana është vërtet një surprizë e bukur e kësaj finaleje. Janë eliminuar skuadrat pretendente dhe në finale do të kemi një klasike të sportit shqiptar, veçanërisht dhe në volejboll, ku Partizani e Tirana do të duelojnë me njëra-tjetrën dhe do ta fitojë trofeun skuadra që siguron e para tri fitore.
