ASNN – Kapitenia kuqezi, sërish vendimtare për skuadrën e saj, Futura Volej. 26-vjeçarja Erblira Bici ka realizuar plot 27 pikë në fitoren 3-2 që skuadra e saj, Futura Volej, arriti të mërkurën në fushën e Montekios. Ky ishte takimi i dytë i betejës për ngjitjen në nivelin më të lartë të volejbollit italian të femrave, në Serinë A1, teksa skuadra e kapitenes së Kombëtares kuqezi e ka mbyllur gjithçka brenda dy ndeshjesh, duke u kualifikuar për në çerekfinale të këtij “play-off”-i. Volebjollistja shqiptare, Erblira Bici, vijon të spikasë në parketin italian dhe të mërkurën, ajo ka arritur një tjetër gur kilometrik.
26-vjeçarja ka realizuar plot 27 pikë në fitoren 3-2 që skuadra e saj, Futura Volej Xhovani Busto Arsizio arriti në fushën e Ipag Montekios. Ky ishte takimi i dytë i betejës për ngjitjen në nivelin më të lartë të volejbollit italian të femrave, në Serinë A1, teksa skuadra e kapitenes së Kombëtares kuqezi e ka mbyllur gjithçka brenda dy ndeshjesh, duke u kualifikuar për në çerekfinale të këtij “play-off”-i. Skuadra e Bicit e kishte fituar në 3 sete takimin e parë në shtëpi, duke vijuar të mbizotërojë edhe në takimin e kthimit, aty ku i ka fituar dy setet e para të sfidës me të njëjtat shifra, 25-23.
Por skuadra vendase nuk ka pranuar të dorëzohet lehtë dhe, duke përfituar edhe nga një nënvlerësim i ekipit të shqiptares, ka vijuar të barazojë gjendjen e seteve në 2-2, duke marrë të 3-tin dhe të 4-tin, përkatisht 26-24 dhe 25-17. Seti i 5-të ka qenë i luftuar, me vendaset që kanë kërkuar ta fitojnë atë, për ta çuar atë në duelin e 3-të dhe me skuadrën mike që ka kërkuar ta mbyllë gjithçka në dy ndeshje. Dhe skuadra e volejbollistes 1 m e 86 cm të lartë ia ka dalë, duke e marrë setin e 5-të 15-13 dhe gjithë ndeshjen 3-2 me sete dhe, bashkë me të, edhe vendin në çerekfinale të këtij “play-off”-i.
Aty ku do të ndeshet me skuadrën e CDA Talmasons në dy ndeshje në 10-ditëshin e fundit të prillit. Në takimin e së mërkurës, Bici shënoi 27 pikë nga 86 pikët që shënoi gjithsej skuadra e saj, teksa 20 pikë të tjera erdhën nga gabimet e kundërshtareve. Futura Volej Xhovani Busto Arsizio e mbylli sezonin e rregullt të grupit të parë të Serisë A2 në vendin e 4-t të renditjes, me 38 pikë, pas 12 fitoreve dhe 8 humbjeve. Duhet theksuar se volejbollistja shqiptare ka qenë vendimtare, duke shënuar afro 25 % të pikëve, pra 390 pikë, nga 1,759 gjithsej që ka realizuar skuadra e saj.
Kjo shifër pikësh e bën kapitenen kuqezi shënuesen e 4-t më të mirë të Serisë A të volejbollit italian të femrave.
