Barleti Volej apo Tirana? Është thënë dhe stërthënë, por dhe e vërtetuar gjatë gjithë këtij sezoni që skuadra e Gorencës garanton sot që të luajë dhe ta konkurrojë “dhëmb për dhëmb” kampionen në fuqi. Ndoshta mund të rëndohet ekipi i Gurabardhi, por bindja është e madhe që shkëmbimi Nezaj-Tuci me Thakën ka qenë në favor të Tiranës së Gorencës.

Klonarda Nezaj është vendimtare për bardheblutë jo vetëm në lojën në bllok, por dhe në shërbim, apo dhe pikët nga sulmi, sidomos kur vjen puna për të kthyer topin e shpejtë në fushën e kundërshtarit nga pozicioni 3. Gjë që Thaka, të paktën deri në këto momente, nuk është duke e bërë plotësisht. Garantohet Tirana për suksesin sepse 7 lojtaret tashmë kanë luajtur bashkë gjatë gjithë sezonit.

Dhe, si të tilla, një pjesë e mirë kanë vite që luajnë bashkë, e kanë formuar atë që grup që sot mund të bëjë surpriza. E kjo që nga Shkurti, lojtarja e lirë Sejfullai, Hoxha e Pirra dhe Blloku së cilës i është është shtuar dhe Nezaj e Tuci. Sigurisht që nuk është më pak Barleti Volej, sidomos me dyshen Braho-Bici. Por, tashmë, kur Tirana ka dhënë “leksion” në atë fitore 3-1 në sallën kryesore të Pallatit të Sportit “Asllan Rusi” duhet një tjetër marsh.

Që duhet të vijë në radhë të parë nga Xheka në organizim e më pas me radhë Xhixha, M. Tuci, Thaka, apo dhe lojtarja e lirë Fagu. Sepse vetëm kështu Barleti Volej mund të mos prishi serinë e trofeve të fituara radhazi. E megjithatë, për herë të parë ndoshta në sezonet e fundit, edhe femrat duket se do të shkojnë me pesë finale për të përcaktuar skuadrën kampione.

Sepse Tirana sot, me të dy ekipet meshkuj dhe femra, është kandidate potenciale për të ngritur trofeun e kampionit. Dhe nuk do të jetë aspak çudi…

Kampionati Kombëtar

i Volejbollit – Femra

Programi i finaleve të “play-off”-it

për titullin “kampion”

22 prill                        Barleti Volej – Tirana           ora 19:00

25 prill                        Tirana – Barleti Volej           ora 18:00

28 prill                        Barleti Volej – Tirana           ora 18:00

1 maj               Tirana – Barleti Volej           ora 18:00

(nëse do të jetë e nevojshme)

4 maj               Barleti Volej – Tirana           ora 18:00

(nëse do të jetë e nevojshme)