Kapitenia e Barletit Volejit, Enkelejda Braho, nuk e ka fshehur se skuadra që luan është më e mira e volejbollit shqiptar. E kjo jo vetëm për shkak të cilësisë në lojë, por dhe për moshën e re që disponon si grup krahasuar me rivalin që kishte përballë në finale, Tiranën. “Ne rikonfirmohemi për të tretën herë radhazi si “kampione” të Shqipërisë, – ka thënë ajo. – Por jo vetëm “kampion”. Këto tre sezone sportive ne kemi fituar gjithçka, çdo trofe të vënë në dispozicion nga Federata Shqiptare e Volejbollit është marrë nga skuadra jonë.

E në të tilla kushte padiskutim që ne jemi më të mirët, pasi rezultatet flasin vetë”, thotë Braho, që më pas ka deklaruar se Tirana ishte një rival i denjë në këtë finale për titull “kampion”. “Ka qenë kundërshtar i denjë sepse ka pas lojtare shumë të mira në formacion, lojtare me përvojë, – ka vijuar volejbollistja e universitareve. – Por kjo nuk ndikon shumë. Me të vërtetë që ato janë lojtare me përvojë, por nuk duhet të harrojmë faktin se ne brezi i ri vijmë gjithmonë në rritje. Kemi bërë një ndeshje të parë finale shumë të bukur që e kemi fituar 3-1.

“Po kështu, kemi bërë, një ndeshje të dytë spektakolare do të thosha në kthim, – ka kujtuar Braho. – Nga 0-2, e përmbysëm në 3-2. Kështu që Tirana ishte sadopak e dorëzuar, por prapë ato luftuan për të arritur për të kapur një ndeshje. Ne nuk ua lejuam dhe fituam me rezultatin e pastër 3-0”. E ardhmja me Barletin Volej, apo jo? Kjo ishte pyetja për kapitenen Braho, e cila i është përgjigjur: “Uroj të jem me të njëjtën fanellë, sepse nuk ka arsye të ndryshoj përderisa nga ana e presidentit jemi të kënaqur me të gjitha sponsorizimet.”

“Por që sapo ka mbaruar kampionati dhe duhet t’i gëzohemi titullit”, – ka theksuar kapitenia e Barleti Volejit. E nuk duket se do të ketë shumë kohë pushimi për Brahon e shoqet e saj, sepse menjëherë nisin përgatitjet për Ligën e Evropës. Ndaj dhe Braho duke e mbyllur thotë: “Tashmë presim grumbullimin dhe çfarë do të na komunikojnë trajnerët”