Barleti Volej i ka bërë 6 Kupa të Shqipërisë, ndërsa dje pasdite, në një ndeshje thuajse pa histori, në sallën kryesore të Pallatit të Sportit “Asllan Rusi” ka mundur Tiranën 3-0. Pikët e para të setit janë të barabarta deri në pushimin e parë teknik, që e gjen Barletin Volej në epërsi 8-6. Madje skuadra e trajnerit Hasan Gurabardhi është shkëputur deri në 10-7, aty ku homologu i tij bardheblu, Adrian Gorenxa, merr pushimin e parë.

Dhe Tirana kthen në lojë e afrohet në 14-13, barazon në 15-15 dhe në pushimin e dytë teknik janë bardheblutë në epërsi 15-16. E megjithatë Barleti Volej kthen në 20-18 dhe fiton setin e parë 25-20. Seti i dytë është “kopje” i të parit, por në kahe të kundërta. Sepse në pushimin e parë teknik është Tirana në epërsi 7-8, në të dytin Barleti Volej 16-14.

E më pas, edhe për shkak të gabimeve të Tiranës, skuadra e Gurabardhit shkëputet në 17-14, 19-14, 21-18, 22-20 dhe 25-20. Në setin e tretë, Tirana është krejtësisht e dorëzuar dhe Barleti Volej fiton me lehtësi 25-11 dhe krejt ndeshjen 3-0. Shënuesja më e mirë e ndeshjes është Enkelejda Braho dhe Fatbardha Picaku e Barletit Volejit, me 14 pikë secila, si dhe Klejda Shkurti e Tiranës, me 10 pikë.

Në bllok ka dalë fituese Jona Gjokutaj (Sallaku) e Tiranës me katër mure të suksesshme, e ndjekur nga Sara Hasku e Barletit Volejit, me dy mure të suksesshme. Në shërbim, është dalluar Eleni Bego e Barleti Volejit, si dhe Klejda Shkurti dhe Jona Gjokuta (Sallaku) të Tiranës, me nga dy rezultative secila.

Barleti Volej – Tirana            3-0

(25-20, 25-20, 25-11)

Barleti Volej: Xheka, Braho, Hasku, Tuci, Fagu (L), Bego, Picaku / Xhelilaj, Veraj. Trajner: H. Gurabardhi

Tirana: Kokonozi (Hoxha), Sejfullai (L), E. Meta, Xhixha, Kushi, Paloka (Shkurti), Gjokuta (Sallaku) / Ahmetaj, Shehi. Trajner: A. Gorenxa

Gjyqtarë: A. Shehu, E. Zenullari (Tiranë)

Ndihmës: K. Tota, A. Nurja (Tiranë)