Barleti Volej ka likuiduar dje pasdite në sallën Nr. 2 të Pallatit të Sportit “Asllan Rusi” Teutën dhe sot është gati për të festuar Shën Valentinin. Kjo ka qenë edhe ideja e trajnerit të kësaj skuadre, Hasan Gurabardhi, që vajzat të ishin të lira të shtunën për të festuar si e gjithë bota, ndërsa ndeshja është luajtur dje. Në fakt me përjashtim të setit të tretë, atje ku në momente të caktuara Gurabardhi ka pasur dhe divergjenca me gjyqtarin kryesor të këtij takimi, Eduard Preka, i cili i ka treguar dhe kartonin e verdhë, në shumicën e lojës Barleti Volej ka qenë superior.
Dhe për këtë flasin qartë dy setet e para, të cilat janë fituar nga kampionet dhe fitueset në fuqi të Kupës së Shqipërisë, 25-15 dhe 25-14. Në të tretin edhe pse durrsaket janë në disavantazh 7-4, 12-9, kanë arritur të barazojnë në 14-14. Madje me shumë vështirësi Barleti Volej arrin të dalë në avantazh 15-14, 17-14, 21-19 dhe në fund 25-22. Pikëshënuesja më e mirë e ndeshjes është Bici i Barletit Volej me 16 pikë, e ndjekur nga Braho e Barletit Volej dhe Guza e Teutës me 11 pikë. Në bllok kanë spikatur Braho, Tuci, A.Gjermeni të Barleti Volej, por dhe Begiçi e Guza të Teutës me dy mure fituese.
Në shërbim është dalluar Bici e Barleti Volej me katër të sakta. Në total në 3 sete Barleti Volej ka shënuar 75 pikë prej të cilave 57 vetë, kurse 18 pikë kanë ardhur nga gabimet e Teutës. Në krahun tjetër durrsaket kanë shënuar në tre sete 51 pikë, prej të cilave 35 vetë, kurse 16 pikë kanë ardhur nga gabimet e skuadrës së Gurabardhit. Ajo që duhet bërë e ditur është fakti se në këtë ndeshje ka qenë prezent presidenti i Barleti Volejit, Gafurr Duda, si dhe Sekretari i Përgjithshëm i Federatës Shqiptare të Volejbollit, Leonard Tase.
Ashtu sikurse kanë qenë edhe një grup vajzash të vogla në mbështetje të Esmeralda Tucit. Në përfundim një fitore e pastër e Barleti Volejit, 3-0.
Barleti Volej – Teuta 3-0
(25-15, 25-14, 25-22)
Barleti Volej: Braho, Bici, Nezaj, Tuci, A. Gjermeni, Harxhi, Fagu (L) / Hasku, Picaku, J. Gjermeni. Trajner: H. Gurabardhi
Teuta: Gashi, Begiçi, Borshi, Zakova, Smajlaj, Guza, Llupo (L) / Dallupi. Trajner: E. Jazenxhiu
Gjyqtarë: E. Preka (Tiranë), R. Kuka (Vlorë)
Kampionati Kombëtar
i Volejbollit – Femra
Java e 8-të
(13-14 shkurt 2015)
Të premten:
Barleti Volej – Teuta 3-0
Të shtunën:
Studenti – Tirana ora 14:00
Partizani – Flamurtari ora 14:00
Vllaznia – Skënderbeu ora 14:00
Renditja
Nr. Skuadra N. F. H. Setet Pikë
- Barleti Volej 8 8 0 24-2 24
- Tirana 7 6 1 19-5 17
- Partizani 7 5 2 17-7 16
- Teuta 8 4 4 13-12 13
- Skënderbeu 7 3 4 10-13 9
- Vllaznia 7 2 5 7-16 6
- Flamurtari 7 1 6 3-20 2
8. Studenti 7 0 7 2-21 1
