ASNN – Nis sot Kampionati i 71-të Kombëtar i Volejbollit për Meshkuj, me derbin kryeqytetas, Partizani-Tirana. Debutuesit e Partizanit, që sivjet drejtohen nga ish-trajneri i Studentit, Ylli Tomorri, do të luajnë ndaj Tiranës nënkampione.
Kjo sfidë, që luhet në Pallatin e Sportit “Asllan Rusi” në orën 18:00, do të transmetohet drejtpërdrejt nga Televizioni Shqiptar. Ky është takimi i vetëm që luhet të premten, pasi ndeshjet e tjera do të luhen në 1 tetor të shtunën, ku spikat Farka Volej-Teuta për meshkuj.
Debuton edhe Erzeni që rikthehet në kampionat pas disa vitesh mungesë. Po të shtunën nisin sfidat edhe në Kampionatin Kombëtar të Volejbollit për Femra. Këtu skuadrat janë ndarë në dy grupe.
Në nivelin më të lartë, që njihet si grupi A1, që përbëhet nga 8 skuadra, luhet për titullin kampion. Skuadra që renditet e fundit zbret në nivelin e dytë, apo grupin A2. Ndërsa skuadra që renditet e para në grupin A2 luan në A1 sezonin e ardhshëm.
