Shefi i klubit shumësportësh kuqeblu: “Nuk flas si trajner i Vllaznisë, por shoh se vazhdon të shkelet procedura ligjore duke injoruar Asamblenë e Federatës Shqiptare të Volejbollit”. Partizani, Erzeni dhe Iliria e Fushë-Krujës do të jenë tre skuadrat që do t’i shtohen volejbollit të meshkujve në kampionatin e sezonit 2016-2017. Por ka edhe kundërshtime, që vijnë më së shumti nga drejtuesi i klubit shumësportësh Vllaznia, Mark Kroqi, që ka vendosur të bëjë opozitarin ndaj drejtuesve të Federatës Shqiptare të Volejbollit.
Sipas tij, megallomania dhe injorimi i Asamblesë është tipar dallues i drejtuesve të Federatës Shqiptare të Volejbollit. “Përmes mediave, – thotë Kroqi, – jemi njohur për ndryshimin e skemës së volejbollit për meshkuj. Personalisht jam për rritjen e cilësisë sportive të skuadrave në volejboll dhe jo për masivizimin në kurriz të cilësisë. Flitet se struktura organizative e kampionatit të sivjetëm kombëtar të volejbollit meshkuj do të ndryshojë me shtimin e paralajmëruar të tre skuadrave. Nuk e kuptoj mbi ç’bazë bëhet ky riformatim strukturor.”
“Mbi ç’kriter apo pjesëmarrje në veprimtaritë zyrtare është bërë përzgjedhja e këtyre ekipeve, a e kanë menduar mirë përfshirjen e këtyre ekipeve direkt në kampionat kur CV-ja e tyre nuk njihet? – ka vijuar ai. – A e ka menduar mirë Federata Shqiptare e Volejbollit një iniciativë të tillë pasi mund të krijohet një precedent nga i cili mund të përfitojë një dhe të prishen tre skuadra? Në fund të fundit a ka ndonjë vendim zyrtar për këtë problem shumë të rëndësishëm, apo vazhdohet me megallomaninë e drejtuesve të fortë që nuk pyet për asnjë?”
“A ka menduar Federata Shqiptare e Volejbollit se çfarë do të bëjë nëse nuk ia miraton Asambleja një nismë të tillë, apo dhe kjo kryesi, si ajo e mëparshmja, do të vazhdojë të pyesë Asamblenë edhe kur me ligj e me statut kërkohet miratimi nga ana e saj dhe jo injorimi i vazhdueshëm”, – ka përfunduar Shefi i Klubit Shumësportësh “Vllaznia”, Mark Kroqi.
