ASNN – Kuqeblutë e Josës, me dilema të shumta për sulmin ndaj rumunëve. Kështu, sulmi mbetet pikëpyetja më e madhe për Vllazninë, në prag të ballafaqimit të turin e dytë eliminator të Ligës së Konferencës me Universitatean e Krajovës. Trajneri Josa ka provuar vazhdimisht 5 lojtarë në vijën e parë, por dëmtimi i Liridon Latifit është një mungesë e madhe për kuqeblutë. Fituesja e Kupës së Shqipërisë, Vllaznia, ka lënë pas fazën përgatitore prej 15 ditësh që zhvilloi në Austri, aty ku luajti edhe 4 ndeshje miqësore.
Ka qenë një periudhë që duhet t’i ketë vlejtur trajnerit Mirel Josa, në përgatitjet për ballafaqimin e turin e dytë eliminator të Ligës së Konferencës me Universitatean e Krajovës, teksa ndeshja e parë luhet më 21 korrik në Shkodër, ndërsa ajo e kthimit një javë më pas në Rumani. Për stafin teknik ka qenë shumë e rëndësishme që, në këto dy javë ngarkesa, lojtarët nuk kanë pasur probleme fizike, me përjashtim të të riut Eraldo Deda, i cili u dëmtua. Mirëpo, shqetësimi më i madh ka qenë Latifi, i cili humbi thuajse 3 javë stërvitje dhe iu bashkua ekipit vetëm në fillim të korrikut.
Burime pranë klubit shkodran kanë pohuar për RTSH Sport se, pas problemeve shëndetësore, futbollisti nga Kosova iu rikthye stërvitjes në Austri dhe po bën maksimumin e tij me një program special për të kapur ritmin. Por, mungesa e gjatë në stërvitje duket se ka lënë pasoja te lojtari dhe ana e tij fizike është shumë larg asaj që kërkohet aktualisht nga stafi. Mësohet se Latifi nuk është ende në formën që mund të marrë minuta në ndeshjen e parë ndaj Universitateas së Krajovës.
Edhe pse ai ka luajtur si zëvendësues në dy miqësoret e fundit të Vllaznisë në Austri, pritet që trajneri kryeqytetas i shkodranëve të mos e ketë lojtarin në planet e tij për ndeshjen e parë. Një mungesë e tillë është tejet e rëndësishme për Vllazninë, duke pasur parasysh cilësitë e sulmuesit nga Prishtina. Gjatë miqësoreve të luajtura në Austri, Josa ka provuar vazhdimisht 5 lojtarë në vijën e parë, pikërisht Krujën, Hoxhën dhe Çobën nga krahët e sulmit, si dhe Aralicën e Kainën në qendër. Mbetet për t’u parë se cili nga këto tre emra do ta nisë nga minuta e parë më 21 korrik.
Një alternativë për sulmin është edhe Kristjan Vulaj, i cili e nisi me gol aventurën te Vllaznia. Mirëpo, ajo që duket se step Josën në prag të ndeshjes së parë është gjendja fizike e lojtarit nga Tuzi. Ai nuk është në 100% të formës, prandaj dhe trajneri nuk e provoi si titullar në Austri.
