Kursantët për licencën “UEFA Pro” kanë qenë dje në një seancë stërvitore të kuqebluve. Udhëheqësi i tyre, Astrit Maçi: “Cungu nga trajnerët më të mirë të futbollit shqiptar”. Seanca e djeshme, e cila ishte edhe e para e kësaj jave për kuqeblutë, kishte një të veçantë pasi e gjithë përgatitja është ndjekur nga fillimi deri në fund nga grupi i trajnerëve të kursit “UEFA Pro”. Një planifikim ky i bërë nga ana e sektorit të edukimit të trajnerëve pranë FSHF-së në kuadrin e orëve teorike që ka në projekt ky kurs.
Pasi kanë marrë pjese në momentin e hapjes së seancës, duke dëgjuar edhe paraqitjen e programit dhe të porosive të dhënë nga trajneri shkodran Armando Cungu, grupi në fjalë i udhëhequr nga Astrit Maçi, përgjegjës i sektorit të edukimit të trajnerëve që ka të bëjë me licencimin e UEFA të të gjitha niveleve, që nga A, B, PRO, ka zënë vend të tribunën VIP të stadiumit “Reshit Rusi”. Secili prej tyre me bllok dhe laps në dorë, hera-herës edhe ndonjë foto të shkrepur, apo edhe regjistrimin e ndonjë pamje filmike, kanë qenë shumë të vëmendshëm për të fiksuar gjithçka nga ajo që trajneri Cungu zbërthente në fushën e lojës.
“Kemi zgjedhur Shkodrën duke qenë se Cungu ka mbaruar kursin për “UEFA Pro” tek ne, – tha në një prononcim ekskluziv për “Sport Ekspres”, drejtuesi i kursit Astrit Maçi. – Dhe duke ditur mënyrën se si punon dhe gjithçka tjetër menduam se ishte shumë e domosdoshme dhe shumë e dobishme që të ishim këtu për të parë një stërvitje që drejton ky trajner. Cungu është zgjedhur, sepse është nga më të mirët në futbollin shqiptar.”
Ndërkohë një gjë të tillë ai e pohoi edhe në mbyllje të gjithë seancës kur i gjithë grupi i trajnerëve zbriti në fushë duke realizuar takimin përmbyllës të seancës. E gjithçka është shoqëruar edhe me një bashkëbisedim mes grupit të trajnerëve dhe vetë Cungut për çështje të ndryshme të trajnimit që ato sapo ndoqën në këtë seancë. Duke folur për kursin në përgjithësi, Maçi bëri të ditur se janë edhe rreth 60 orë ku ndiqen stërvitjet në ekip.
“Konkretisht si seancë e parë e javës grupi në fjalë vëzhgoi nga afër se si e ka ndërtuar punën Cungu që nga ngarkesat fizike dhe ato tekniko-taktike, – tha Maçi. – Pastaj në fund fare u bë një përmbledhje e gjithë asaj që u aplikua në procesin stërvitor duke shpjeguar edhe mënyrën se si është punuar për të gjithë elementet në fjalë në shërbim të përgatitjes për ndeshjen e ardhshme.”
Më tej Maçi bëri të ditur se “grupi në fjalë i trajnerëve të kursit UEFA Pro përbëhet nga 16 vetë, trajnerë dhe ish futbollistë të njohur, me të cilët kemi ndjekur edhe ekipet e tjera të kampionatit shqiptar. Kemi parë Tiranën, Partizanin dhe Teutën”, ka përfunduar Maçi.
