AlbanianSport.com 15.11.2016 10:40
ASNN – Kuqeblutë e Vllaznisë do të rikthehen pas plot dy muajsh në Stadiumin “Loro Boriçi”. Federata Shqiptare e Futbollit ka vendosur që ndeshja Vllaznia-Partizani, më e rëndësishmja e javës së 11-të të Kategorisë Superiore të Kampionatit Kombëtar të Futbollit, të luhet ditën e diel, në orën 17.00.
Mbetet për t’u parë se në ç’gjendje do të jetë fusha e stadiumit të Shkodrës, veçanërisht pas shirave të dendur të javës së fundit, ndonëse, në prag të sfidës së Kombëtares me Izraelin, u tha që fusha ishte në gjendje mjaft të mirë.
Bilanci i përballjeve që shkodranët kanë zhvilluar në stadiumin e rindërtuar, ku duhet theksuar se kanë luajtur pak, është pozitiv, me barazimin ndaj Kukësit dhe fitoren ndaj Flamurtarit, çka e bënë këtë të tretën ndeshje në shtëpi për ekipin e trajnerit Armando Cungut.
Duke përfituar edhe nga ndërprerja për shkak të ndeshjes së Kombëtares, skuadra kuqezi përgatitet prej ditësh për këtë sfidë, por gjërat nuk kanë shkuar ashtu si duhet, sepse janë disa lojtarë ende në fazën e rikuperimit.
Prandaj, mbetet për t’u parë se cili prej tyre do të mundet të luajë. Siç dihet, edhe mesfushori Bardulla do të mungojë, për arsye kartonësh. Ndeshja e fazës së parë me Partizanin, e luajtur në Elbasan, u mbyll në barazim.