ASNN – Miqësorja, Vllaznia-Burreli, e luajtur në Stadiumin “Loro Boriçi” të Shkodrës ka përfunduar me rezultatin 2-1 në favor të kuqebluve. Që të 3 golat e kësaj ndeshjeje janë shënuar në pjesën e parë. Të parët kanë kaluar në epërsi miqtë nga Burreli përmes Ejomit, i cili duke shfrytëzuar hutimin e mbrojtjes kuqeblu, tund rrjetën e portjerit të Vllaznisë, Zogoviç.
Për të barazuar rezultatin duhej të vinte minuta e 25-të. Me një gjuajtje mjaft të bukur nga distanca kapiten Gurishta e dërgon ropin në rrjetën e Bushit duke e çuar rezultatin në 1-1. Tetë minuta më vonë është Mehdi Çoba që shënon golin e dytë duke e kaluar në avantazh epërsi me rezultatin 2-1. 45 minutat e dyta u shoqëruan me ndryshime të shumta në formacion nga të dyja skuadrat,.
Dhe, megjithë përpjekjet e të dy kampeve përkatëse, rezultati nuk ndryshoi duke mbetur në fuqi ai i pjesës së parë, 2-1 në favor të Vllaznisë. Kjo ishte miqësorja e parë për skuadrën kuqeblu që prej fillimit të fazës përgatitore të sezonit 2021-2022. Një miqësore që i shërbeu stafit teknik për të parë gjendjen aktuale, fizike dhe teknike të skuadrës.
