ASNN – Në prag të ndeshjes së të mërkurës me Teutën, të vlefshme për javën e 22-të të Kategorisë Superiore, para mediave ka dalë të martën Drejtori Sportiv i KF “Vllaznia”, Matko Djarmati, i cili është ndalur edhe tek analiza e ndeshjes së kaluar me Tiranën. Po ashtu, ai ka folur edhe për situatën në ekip dhe shpresat për të dalë nga situata e krijuar që në takimin e së mërkurës në Durrës. “Do të provojmë t’i zgjidhim këto situata, – ka thënë ai fillimisht. – Patëm një diskutim 1 orë e gjysmë dhe besoj e dimë ku është problemi.”
“Do të përpiqemi të zgjidhim problemin dhe të vazhdojmë në rrugën që ishim deri më tani”, – ka shtuar kroati. A është problemi i Vllaznisë psikologjik apo teknik? “Të dyja! – përgjigjet ish-futbollisti i njohur. – Edhe psikologjikisht, ekipi nuk u është përgjigjur përgatitjeve që kemi bërë ndaj Tiranës, por edhe në aspekt teknik kemi pasur disa mungesa që do të zgjidhen në stërvitje. Ndërkohë, kemi sjellë 3 lojtarë në ekip. Po shikojmë që edhe ekipet e tjera, dalëngadalë po aktivizojnë lojtarët e rinj në skuadër. Edhe ne nuk kishim dëshirë të prishnim grupin që kishim ndërtuar.”
“Këta lojtarët e rinj duan pak kohë, por besoj që, nga nesër, njëri nga ata do të jetë në fushën e blertë”, – shton drejtuesi kuqezi, për të cilin sfida me Teutën nuk është vendimtare, pasi ka edhe 15 javë deri në fund të kampionatit. “Por me një rezultat pozitiv ka mundësi ekipi të rritet psikologjikisht, – ka pohuar ai. – Pastaj besoj do të jemi në shinat që ishim para 10 javëve. Deri tani nuk e kemi diskutuar fare çështjen e trajnerit. Me sponsorin kishim një takim, nuk kemi përmendur asnjë ndryshim.” Në vijim, Djarmati ka folur edhe për synimet e Vllaznisë në Kupë.
“Absolutisht që jemi favoritë, luajnë ndaj një skuadre që vjen nga një kategori më poshtë në stadiumin tonë, çdo rezultat tjetër do të ishte zhgënjyes, – ka theksuar ai. – Deri në Kupë kemi 2 ndeshje kampionati. Do të provojmë të bëjmë maksimumin në të dy veprimtaritë. Që kur kam ardhur ditën e parë kam thënë që objektiv kemi Kupat e Evropës. Ky është objektivi i klubit. Siç ka shkuar kampionati, patjetër që çdo njeri ka objektiva të larta, por unë gjithmonë kam dhënë përgjigje të njëjta 5-6 herë sa i përket objektivit. Edhe ditën e parë kur kam ardhur, edhe javën e 10-të, edhe të 20-tën.”
“Për mua objektivi kryesor janë Kupët e Evropës, – ka këmbëngulur drejtues i Vllaznisë. – Shpresoj që sa më shpejtë të dalim nga kjo krizë rezultatesh dhe të vazhdojmë atje ku pretendoj unë, trajnerët dhe drejtuesit. Nëse vjen një shans 3 javë para fundit të kampionatit, patjetër që titulli do të jetë një synim. Ne nuk ndryshojmë dot gjë. Se kanë bërë aleanca apo jo s’është në dorën tonë. Nuk kemi frikë asnjë, por duhet të kemi kujdes me këto puna. Në dorën tonë është ndeshja kundër Teutës, Kukësit, apo Bylisit në Shkodër.”
“Të gjitha të tjerat nuk janë në dorën tonë. Është në dorën e FSHF-së nëse ekziston një aleancë e tillë”, – ka përfunduar Drejtori Sportiv i KF “Vllaznia”, Matko Djarmati.
