ASNN – Klubi i Vllaznisë ka shkaktuar jo pak habi të dielën, kur bëri të ditur se në postin e drejtorit teknik të kuqebluve ishte përzgjedhur kandidatura e Engin Fëratit. Në fakt, ndërkohë që në Shqipëri është një emër pothuajse i panjohur, ose i njohur nga pak njerëz me të cilët ai ka patur kontakt në disa vizita në vendin tonë, ai është një njeri i shëtitur dhe i njohur, si në Turqi, në Gjermani, në Iran, madje edhe në Kore të Jugut.
Trajneri i diplomuar në Gjermani dhe i liçencuar nga UEFA, e ka nisur shumë shpejt karrierën, më 1997-ën, teksa ishte vetëm 27 vjeç, çka e bëri atë trajneri më të ri në Evropë të futbollit profesionist. Dhe, pas dy viteve në Turqi, me Samsunsporin dhe Antaljasporin, ka vijuar më pas, për dy vjet, në Bundesligën gjermane, si pjesë e stafit teknik të Eintrahtit të Frankfurtit.
Që atëherë ka punuar për afro 10 vite me trajnerin e njohur gjerman, Verner Lorant. Karriera e Fëratit e ka çuar atë sa tek Fenerbahçe në Turqi, tek LR Ahleni në Gjermani, tek Inçeon Junajtid në Korej të Jugut, për ta kthyer më pas tek Sivaspori në Turqi, por edhe tek Saipa dhe përfaqësuesja e Iranit. Aksi Stamboll Teheran do ta mbajë atë të lidhur për afro 10 vjet.
Ndërsa më së fundi ai ka provuar fatin edhe në Shtetet e Bashkuara të Amerikës, me Dallas FC. Me një përvojë 20-vjeçare, ai vjen si një vlerë e shtuar tek Vllaznia, për të punuar me trajneri Hasan Lika për ta ringritur Vllazninë. Mbetet për t’u parë sesa do të funksionojë ky eksperiment, që do t’i japë turkut autoritet të plotë në drejtimin e klubit, për ta shndërruar atë në një klub bashkëkohor.
