ASNN – Java e 5-të e Kategorisë Superiore ka vijuar të shtunën me dy ndeshjet e para dhe nuk pati fitues në Stadiumin “Adush Muça” të Ballshit, në sfidën e parë, teksa Bylisi dhe Egnatia ndanë nga një pikë secila. Një sfidë që rezultoi e luftuar deri në minutat e fundit dhe asnjëra nuk ia doli të shënonte gol duke bërë që kjo përballje të mbyllej në paqe mes dy ekipeve. Pas këtij barazimi, ballshiotët kanë grumbulluar 8 pikë të pozicionuar në vendin e 3-të, ndërsa nga ana tjetër rrogozhinasit kanë 1 pikë më pak, 7-të duke u renditur në vendin e 5-të.
Ndërkaq, sfida e dytë e ditës së shtunës, midis Erzenit dhe Laçit, një takim ky i luajtur në Stadiumin “Niko Dovana” të Durrësit, ka qenë një ndeshje e luftuar, me shijakasit që i shkaktoi humbjen e 4-të radhazi Laçit, pasi triumfuan 1-0. Në pjesën e parë Erzeni bëri lojën, duke krijuar disa raste për shënim, por shijakasit nuk do të tregoheshin të saktë në finalizim. Nëse lojën e bëri Erzeni, golin e shënoi Laçi me Spahiun në minutën e 17-të, por VAR-i do të shndërrohej në protagonist në Durrës”, pasi goli do të anulohet për pozicion jashtë loje të Spahiut.
Vendasit do të pretendonin edhe për 11-metërsh, por gjyqtari Meta nuk ishte i këtij mendimi, me 45-minutat e para do të mbylleshin me rrjeta të paprekura. Në pjesën e dytë, rastet për gol do të ishin sa nga njëra portë në portën tjetër, por dukshëm lojtarët e dy skuadrave do të “dështonin” në pasin e fundit, duke mos gjetur rrugën e rrjetës. Goli vendimtar i takimit erdhi në 8 minutat shtesë, teksa Nonato do të pengohet në zonë nga Dajsinanidhe për gjyqtarin nuk ka dyshime: 11-metërsh. Nga pika e bardhë godet Amir që zhbllokon këtë sfidë.
Me këtë fitore, shijakasit marrin kreun me 2 pikë më shumë se Partizani, me këtë të fundit që do të përballet me Kukësin ditën e hënë, ndërsa nga krahu tjetër Laçi ka humbur “drejtimin” këtë sezon, pasi pëson kështu humbjen e 4-të radhazi në kampionat. Pas fitores 4-0 që Tirana arriti të premten në kryeqytet ndaj Teutës, në prologun e javës, Vllaznia përballet të dielën në mbrëmje në shtëpi me Kastriotin, ndërsa Partizani viziton Kukësin, për t’u ndeshur të hënën pasdite me skuadrën vendase, në takimin që mbyll javën e 5-të të Kategorisë Superiore.
