ASNN – Majlinda Kelmendi do të kthehet në garim këtë fundjavë, pas 14 muajsh mungesë. Kampionia Olimpike në fuqi e xhudos për femra, do të garojë në Çmimin e Madh të Abu Dhabit, që mbahet nga data 27, deri më 29 tetor 2018 në kryeqytetin e Emirateve të Bashkuara Arabe. Pas një ndërprerje prej 14 muajsh për shkak të dëmtimit të pësuar në Kampionatin Botëror, të mbajtur në fund të muajit gusht të vitit të kaluar në kryeqytetin e Hungarisë, Budapest, Kelmendi do të kthehet në garim këtë fundjavë.
Kampionia Olimpike në fuqi e xhudos për femra, e cila mori medaljen e artë në Lojërat Olimpike “Rio 2016”, do të garojë në Çmimin e Madh (Grand Slemin) e xhudos në Abu Dhabi, që mbahet nga data 27, deri më 29 tetor 2018 në kryeqytetin e Emirateve të Bashkuara Arabe. Në Abu Dhabi, Majlinda pati fituar medaljen e artë në vitet 2011, 2012 dhe 2014, ndërsa në 2015-ën fitoi të bronztën. Trajneri i Majlindës, Driton Kuka, nuk e ka fshehur kënaqësinë që kampionia nga Peha po rikthehet në tapet.
“Po, Majlinda do të kthehet këtë javë në gara, pas një pauze të gjatë, – ka pohuar ai, i cituar nga faqja zyrtare në Internet e Komitetit Olimpik të Kosovës. “Sa i përket shanseve për medalje, kjo ka qenë një pauzë e gjatë dhe nuk e di se si ka ndikuar tek sportistja”, – ka shtuar Kuka. Krahas Majlindës, që garon në kategorinë e peshës trupore deri në 52 kilogramë në Abu Dhabi, turne ky që vlen si kualifikues për në Olimpiadën “Tokio 2020”, Kosovën e përfaqësojnë edhe 3 xhudistë të tjerë.
Kështu, do të konkurrojë në kryeqytetin e Emirateve të Bashkuara Arabe kampionia e Evropës në kategorinë e peshës trupore deri 57 kilogramë, Nora Gjakova, por edhe Distria Krasniqi (-48 kg.) dhe Akil Gjakova (-73 kg.) Majlinda, Nora dhe Distria do të garojnë të shtunën, ndërsa Akili të dielën.
