ASNN – Luhet në Sallën Sportive të Farkës gjysmëfinalet dhe finalet e Kupës së Federatës. Rrjeta shqiptare do të ngrejë siparin e sezonit të ri të saj me veprimtarinë e parë, që është pikërisht Kupa e Federatës. Kjo veprimtari do të zhvillohet përgjatë 3 ditëve të fundjavës dhe organizimi që qeveris rrjetën në vend, Federata Shqiptare e Volejbollit, ka përzgjedhur Sallën e re sportive të Farkës për organizimin e kësaj veprimtarie.
Kjo Sallë e kaloi me sukses provën, teksa shërbeu gjatë verës si mikpritëse e ndeshjeve të njërit prej grupeve të fazës finale të Kampionatit Evropian të Nën-17-vjeçarëve. Kështu, në bazë të formulës së përcaktuar paraprakisht, tek femrat, në çiftin e parë të gjysmëfinaleve, Tirana do të përballet të premten me Barleti Volejin, në takimin që nis në ora 16:00. Ndërkaq, në ora 19:00 nis dueli i dytë i gjysmëfinaleve, midis Partizanit dhe Vllaznisë.
Një ditë më pas, të shtunën, luhen ndeshjet e meshkujve, ku, në çiftin e parë të gjysmëfinaleve, Partizani sfidon në derbin e kryeqytetit Tiranën, në ndeshjen që nis në ora 16:00. Ndërsa në duelin tjetër, që nis në ora 19:00, Erzeni përballet me Vllazninë. Dy finalet e Kupës së Federatës luhen të dielën, duke nisur me atë të femrave, në orën 19:00, dhe atë të meshkujve, që nis në ora 19:00.
