ASNN – Takimi i parë i turit të dytë eliminator të Ligës së Konferencës mbyllet 1-1. Kështu, Vllaznia e ka mbyllur në barazim 1-1 të enjten takimin e parë të turit të dytë të Ligës së Konferencës përballë Universitateas së Krajovës. Takimi që u luajt në Stadiumin “Loro Boriçi” të Shkodrës u soll për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH 1.
Pjesa e parë mes Vllaznisë dhe Universitateas së Krajovës në “Loro Boriçi” ishte e luftuar mes të dyja ekipeve të cilat provonin të shënonin. Miqtë arritën që në minutën e 38-të të gjenin rrugën e rrjetës, por goli do të anulohet për pozicion jashtë loje nga gjyqtari kryesorë i takimit. Sidoqoftë, goli i epërsisë për skuadrën mike nuk do të vononte.
Kjo sepse rumunët do të shënonin me anë të një 11-metërshi të dhënë për ta në minutat shtesë të pjesë së parë. Në pjesën e dytë shkodranët e trajnerit kryeqytetas, Mirel Josës, do ta nisnin më mirë, teksa në minutën e 51-të do të barazoheshin shifrat në “Loro Boriçi”. Ardit Hoxhaj do të rikthente barazpeshën në rezultat falë golit të tij dhe e gjithë festa është në kampin kuqeblu.
Vllaznia merr zemër, teksa raste të pastra për të shënuar në portën kundërshtare, por të besuarit e Josës nuk mundën të finalizonin rastet e krijuara. Deri në fund kjo sfidë nuk prodhoi gola të tjerë, me takimin që mbyllet 1-1, me skuadrat që lënë gjithçka të hapur për ndeshjen e kthimit, e cila do të luhet më 28 korrik 2022 në Rumani.
