ASNN – Vllaznia, triumf për t’u konsoliduar e 3-ta. Fiton 2-1 ndaj Teutës, që zhytet edhe më thellë në betejën për mbijetesë. Takimi tjetër i mbrëmjes, i vlefshëm për javën e 23-të të Kategorisë Superiore, ka qenë ai që u luaj në Stadiumin “Loro Boriçi” të Shkodrës, ku Vllaznia ka mundur Teutën me shifrat 2-1.
Pjesa e parë është mbyllur me epërsinë minimale të kuqebluve, pasi në minutën e 26-të, pas ekzekutimit të një goditje dënimi dhe një skeme në skajet e pozicionit jashtëloje, Gruda ka realizuar një gol që kërkoi dhe verifikimin e Sistemit të Ndihmësgjyqtarit të Videos (VAR) për të konsideruar gjithçka të rregullt.
Në minutën e 38-të, ka ardhur një mundësi e mirë për Teutën me një aksion nga e majta e sulmit, me Qarrin që neutralizon gjithçka me ndërhyrjen e tij, ndërkohë që Daci ishte i vetëm në zonë për të vepruar. Pjesa e dytë ka parë një lojë të hapur dhe të luftuar nga ana e të dyja skuadrave.
Dhe në minutën e 72-të, është Teuta që ka arritur të vendosë barazpeshën, pasi Arifi godet bukur me kokë brenda zonës dhe arrin të mposhtë Qarrin në katërkëndorin e portës shkodrane. Megjithatë, 7 minuta para fundit të kohës së rregullt, është Çoba që ka rikthyer epërsinë e vendasve, teksa pas një kundërsulmi të shpejtë, sulmuesi i aktivizuar si zëvendësues ka mposhtur portierin Vata.
Minutat e mbetura dhe ato shtesë nuk kanë sjellë gola të tjerë dhe Vllaznia mund kështu Teutën 2-1 në “Loro Boriçi”, duke konsoliduar vendin e 3-të të renditjes, ndërsa Teuta mbetet gjithnjë e më e zhytur në betejën për mbijetesë që sa vjen e po vështirësohet.
