ASNN – Afati i vënë nga organizmi kontinental sugjeron ngjeshjen e kalendarit të veprimtarive. Lidhur me ndeshjet e klubeve, UEFA ka kërkuar përpjekje maksimale nga të gjitha garat vendore dhe evropiane të klubeve që të mbyllin sezonin më 30 qershor 2020. Kjo nënkupton se futbolli shqiptar, i cili u ndal në fillim të javës së shkuar, duhet të ngjeshë kalendarin e ndeshjeve nëse synon ta mbyllë gjithçka brenda këtij afati të vendosur.
Vendimet e marra të martën pasdreke nga një video-konferencë përmes internetit me të gjitha federatat anëtare të organizmit që qeveris futbollin evropian, UEFA, pritet të ndikojë edhe në mbarëvajten e futbollit shqiptar. Lidhur me ndeshjet e klubeve, UEFA ka kërkuar përpjekje maksimale nga të gjitha garat vendore dhe evropiane të klubeve që të mbyllin sezonin më 30 qershor 2020. Për rrjedhojë, organizmi kontinental ka kërkuar kufizim të hapësirave përgjatë javëve në mënyrë që të mund të përdoren nga ligat kombëtare si dhe UEFA.
Kjo nënkupton se futbolli shqiptar, i cili u ndal në fillim të javës së shkuar, pas mbylljes së ndeshjeve të javës së 26-të të Kategorisë Superiore, si dhe atyre të javës së 18-të të Kategorisë së Parë, duhet të mbyllë gjithçka brenda ditës së fundit të qershorit të këtij viti. Pra, janë 10 javë të Superiores, por edhe 9 javë të Kategorisë së Parë për t’u luajtur, që në ritëm normal kërkojnë të paktën dy muaj, ndërkohë që midis tyre duhet të gjendet vend edhe për të paktën 5 mesjava për ndeshjet e çerekfinaleve dhe gjysmëfinaleve të Kupës së Shqipërisë.
Dhe këtu nuk po llogaritim finalen e sa apo finalet, por edhe ndeshjet e “play-off”-it dhe të “play-out”-it të kategorive të ndryshme, për ngjitjen më lart apo rënien më poshtë. Në rastin më të mirë, që gjendja të normalizohet dhe të garat t’u kthehen fushave të blerta, qoftë edhe me dyer të mbyllura si fillim, si masë ndaj rrezikut të koronavirusit, më 3 prill 2020, prapëseprapë koha nuk mjafton. Dhe kjo pritet të sjellë ngjeshje të kalendarit të ndeshjeve dhe, sipas të gjitha gjasave, skuadrat do të luajnë një ndeshje çdo 4-5 ditë nëse synohet të arrihet kufiri i fundqershorit, i vënë nga UEFA.
