ASNN – Aleksandër Çeferin është presidenti i ri i UEFA-s. Ish-presidenti i Federatës Sllovene të Futbollit mori 42 vota, kundrejt 13 votave që mori kandidati tjetër, holandezi Majkëll Van Praag. Çeferini do të zëvendësojë kështu Mishel Platininë, i cili është përjashtuar nga detyra për 4 vite nga Komisioni i disiplinës së UEA-s.
Kështu, Aleksandër Çeferini është zgjedhur presidenti i ri i organizmit që qeveris futbollin në “kontinentin e vjetër”. Ish-presidenti I Federatës Sllovene të Futbollit ka marrë 42 vota, kundrejt vetëm 13 votave që mori kandidati tjetër, holandezi Majkëll Van Praag.
E mbetur pa drejtues, pas përjashtimit të Mishel Platini për 4 vite nga të gjitha veprimtaritë sportive, me akuzën e marrjes së parave në mënyrë të paligjshme nga FIFA, organizmi më i madh evropian i futbollit është detyruar të bëjë zgjedhje të jashtëzakonshme.
Angel Maria Vijar, presidenti i komanduar I UEFA-s, hapi Kongresin e 12-të në Athinë dhe, fillimisht, i ka dhënë fjalën Platinisë: “Dua të them se e kam ndërgjegjen e pastër. Jam i bindur se nuk kam bërë asnjë gabim dhe do të vazhdoj të luftoj derisa të fitoj pafajësinë” – është shprehur Platini.
Më pas është kaluar në votim nga ana e 55 delegatëve. Në përfundim pas numërimit të votave, fitues është shpallur Aleksandër Çeferin. Slloveni 48 vjeçar, gjatë fushatës së tij, disa ditë më parë vizitoi edhe Shqipërinë, ku u takua me presidentin e FSHF-së, Armand Duka.
