ASNN – Teuta-Tirana, një barazim “i çmendur”. Mbyllet 2-2, kryeqytetasit shpërdorojnë, por durrsakët luftojnë për një pikë. Tirana ka shpërdoruar një epërsi prej dy golash të premten në mbrëmje, teksa sfida ndaj Teutës në “Niko Dovana” është mbyllur në barazim 2-2, me të dyja skuadrat që detyrohen të kënaqen me nga një pikë në atë që ishte një ndeshje e luftuar nga fillimi deri në fund.
Megjithëse janë vendasit që e nisin më mirë, është Tirana që kalon në epërsi në minutën e 24-t, kur Lushkja ka goditur saktësisht nga larg, duke mposhtur portierin Dema. Edhe pse 9 minuta më pas kryeqytetasit rrezikojnë sërish, por goditja e Haxhiut ndalet nga shtylla e majtë pingule e portës durrsake, pjesa e parë mbyllet me epërsinë minimale të Tiranës.
Ajo e dyta nis sërish më mirë për kryeqytetasit, pasi në minutën e 50-të, Pas një sulmi nga e djathta me protagonist Haxhiun, topi ka përfunduar në këmbët e Abazajt, i cili nuk e ka të vështirë të shënojë. Por 40 minutat e mbetura do të flasin për Teutën, që reagon dhe, pasi Daci është ndalur nga ndërhyrja e Përgjonit në minutën e 61-të, po kështu ndodhe edhe 7 minuta më pas me Llocin, i cili ndalet nga portieri mik, Abdullahu.
Por trysnia e skuadrës vendase do të japë fryte në minutën e 80-të, kur Lloci ka ngushtuar hendekun e golave me një finalizim të bukur nga e djathta e sulmit durrsak. Pa u mbushur ende dy minuta lojë, është sërish 23-vjeçari i ardhur nga Belgjika, që bën heroin, duke shënuar dhe golin e tij të dytë dhe duke vendosur barazpeshën në “Niko Dovana”.
10 minutat e mbetura të kohës së rregullt dhe ato 4 shtesë kanë qenë të ethshme, teksa Albi Doka ndëshkohet me karton të kuq duke e lënë Tiranën me një lojtar më pak në të 87-tën, ndërsa Lloci humb mundësinë për të kurorëzuar një përmbysje të pabesueshme. Mbyllet kështu në barazim 2-2 kjo përballje midis Teutës dhe Tiranës, një pikë që i lë durrsakët në fundin e renditjes, me 17 pikë, ndërsa kryeqytetasit ndodhen hëpërhë në vendin e 3-të, me 30 pikë.
