ASNN – Teuta, vazhdon ringritja në renditje. Mposhti 3-0 Erzenin në “Niko Dovana” dhe bën “rrokadë” me shijakasit. Takimi i dytë i së shtunës, i vlefshëm për javën e 26-të të Kategorisë Superiore, ka qenë ai që u luajt në Stadiumin “Niko Dovana” të Durrësit, aty ku Teuta ka pritur në derbi Erzenin, duke e zgjidhur gjithçka, sikundër edhe Vllaznia në Shkodër, brenda pjesës së parë.
Në fakt, përballja e fqinjëve, që i ndante vetëm një pikë në fundin e renditjes në prag të sfidë së të shtunës, ka parë një lojë të barabartë në fillim, me të dyja skuadrat që e hedhin vështrimin drejt portave përkatëse. Teuta e ka gjetur e para golin, teksa në të 27-ën minutë, pas një goditjeje këndi, Jazxhi pason për Llocin dhe ky i fundit nuk fal duke i kaluar në epërsi durrsakët.
11 minuta më pas, është sërish Jazxhi që pason me kokë për kapitenin Beqja, nuk zhgënjen dhe dyfishon shifrat. Ndonëse do të duhen 2-3 minuta pritje, pas rishikimit në Sistemin e Ndihmësgjyqtarit të Videos (VAR), goli konfirmohet dhe me epërsinë e dyfishtë të vendasve mbyllet pjesa e parë. Ajo e dyta nis praktikisht me gol, pasi në minutën e 53-të, pas një kundërsulmi të shpejtë, Boçi pasion për Dacin.
Ky i fundit godet dhe mposht Hasanbellin. 37 minutat e mbetura të kohës së rregullt dhe ato shtesë nuk kanë sjellë gola të tjerë dhe Teuta mund Erzenin 3-0, duke bërë edhe “rrokadën” në renditje, pasi durrsakët mbajnë tanimë vendin e 8-të, me 28 pikë, dy më tepër sesa shijakasit.
