ASNN – Lara Kolturi e pandalshme, medalje bronzi në Botërorin e Të Rinjve dhe Të Rejave në Francë. Skiatorja italiane që ka zgjedhur të përfaqësojë Shqipërinë, fitoi të premten medaljen e bronztë në garën e sllallomit gjigand, në Botërorin e kësaj grupmoshe, që po zhvillohet Port Du Soleil të Francës. Kolturi bëri një paraqitje mjaft të mirë, duke i dhuruar Shqipërisë një tjetër medalje botërore, pas atyre të një vit më parë, po në kategorinë e të rejave.
Pas dy zbritjeve, skiatorja kuqezi dha kohën e përgjithshme prej 2 minutash, 3 sekondash e 14 të qindtash. Pas zbritjes së parë ajo ishte e 3-ta, me kohën 59 sekonda e 91 të qindtat, pozicion që e ruajti edhe pas zbritjes së dytë, ku dha kohën 1 minutë, 3 sekonda dhe 12 të qindtat. Kolturi shpresonte të kapte medaljen e artë në këtë garë, pas paraqitjeve të mira në Kupën e Botës.
Por edhe vendi i 3-të është një rezultat shumë i mirë për skiatoren 17-vjeçare, që ngre sërish lart flamurin kuqezi. Aventura e Lara Kolturit në këtë Botëror do të vijojë edhe ditën e shtunë, me garën e sllallomit, ku sërish skiatorja kuqezi do të synojë podiumin. Në garën e sotme, për ngjyrat kuqezi garoi edhe skiatorja Kiara Di Kamilo, që u rendit në vendin e 61-të, me kohën e përgjithshme 2 minuta, 39 sekonda e 97 të qindtat, duke qenë shumë larg kreut.
