ASNN – Shqipëria do të përballet me Maqedoninë në shtator, në një ndeshje të vlefshme për Eliminatoret e Botërorit 2018, që mund të vendosë mjaft sa i përket vendit të 3-të në grup. Por përzgjedhja e stadiumit nga ana e palës maqedonase ka krijuar polemika, për më tepër që, përkundër vërejtjeve që ka patur UEFA, vetë organizmi që qeveris futbollin kontinental e ka miratuar këtë përzgjedhje.

Në një spot promocional të turizmit në Maqedoni, ndër të tjera, duke synuar joshjen e të huajve, thuhet se Shkupi është vetëm 297 km nga porti i Durrësit. Të bën përshtypje ky fakt teksa është bërë e ditur se ndeshja e shtatorit midis Maqedonisë dhe Shqipërisë është degdisur të luhet në Stadiumin “Mladost” të Shtrumicës. Pra, kur u intereson, fqinjëve tanë lindorë u duket Shqipëria aq e afërt, sa na përfshijnë edhe në promovimin e turizmit të tyre. Ndërsa kur nuk u intereson, një ndeshje të vështirë, që mund të rezultojë përcaktuese në vendin e 3-të në një grup me 4 herë kampionen e botës, Italinë, dhe një herë kampionen e botës, Spanjën, vendosin ta luajnë në skajin më lindor të vendit, në kufi me Bullgarinë. Në fakt, ky vendim ka shtangur edhe vetë Federatën Shqiptare të Futbollit, e cila ka bërë edhe një sqarim zyrtar. “Nisur edhe nga rethanat e një ndeshje delikate UEFA ngriti një grup inspektimi të sajin për të parë edhe stadiumin e Strumicas, një impiant që nuk përputhet aspak për standartet ndërkombëtare të zhvillimit të ndeshjes eliminatore zyrtare”, – shkruhet ndër të tjera në sqarimin e organizmit që qeveris futbollin shqiptar, e cila vijon: “Në konfirmin e tyre të mëvonshëm, si dhe pas inspektimit të grupit të punës, UEFA vendosi që për arsye sigurie ndeshja zyrtare eliminatore e shtatorit MAQEDONI-SHQIPËRI të luhet në stadiumin e Strumicas, dhe jo në Shkup, pasi në argumentin e tyre, ata kishin më shumë primare garancinë e sigurisë për tifozët, gjë për të cilën ishin më shumë të sigurtë në Strumica, se sa në Shkup, në stadiumin “Filipi i 2-të. Dhe për këtë ajo ka marrë garancitë përkatëse.” FSHF ndërkaq i është drejtuar vetëm para pak ditësh Sekretarit të Përgjithshëm të UEFA-s, për këtë shqetësim, më pas edhe Drejtorisë për Sigurinë e Stadiumeve në UEFA, ku i përcolli edhe shqetësimin në lidhje me këtë vendim, për zhvillimin e ndeshjes, në një impiant ku nuk i plotëson standartet ndërkombëtare, por që sipas korrespondencës, dhe pas inspektimit u vendos që për arsye sigurie të luhet atje. Me pak fjalë, ky stadium modern dhe i përmasave evropiane, 34,000 vendësh, nuk i përmbush dot kërkesat e organizmit që qeveris futbollin kontinental, për sigurinë e tifozëve, ndërsa ky tjetri, të cilin po jua lëmë shikuesve ta gjykojnë, e ku Shqipëria do të ketë të drejtën e vetëm 325 biletave, sepse është vetëm 6,500-vendësh, nuk i përmbush.

Natyrisht, caktimi i stadiumit është e drejtë ekskluzive e vendit mikpritës dhe nuk është sekret që zgjidhet një stadium sa më pak i volitshëm për kundërshtarin, por zgjedhja e një stadiumi të tillë për një ndeshje ndaj Shqipërisë, të sjell ndërmend incidentet e 2011-tës apo edhe më herët në Prilep, ku nuk munguan koret raciste anti-shqiptare…