ASNN – Shpresat, për fitore edhe në Slloveni, flasin futbollistët kuqezi, Tafas dhe Mitaj, synojnë maksimumin edhe ndaj Kosovës. Kombëtarja shqiptare e Nën-21-vjeçarëve ka nisur që prej ditës së diel grumbullimin dhe përgatitjet në kuadër të dy ndeshjeve të radhës ndaj Sllovenisë dhe Kosovës, të vlefshme për Eliminatoret e Kampionatit Evropian 2023. Në prag të këtyre dy ndeshjeve, në një konferencë për mediat kanë dalë të hënën dy futbollistët e ekipit Shpresa, Angelo Tafas dhe Mario Mitaj.
Edhe talenti shqiptar i AEK-ut, Mario Mitaj theksoi faktin se skuadra po kalon një gjendje të mirë, ndërsa u shpreh se skuadra ndaj Sllovenisë do të futet me të njëjtin mentalitet si në Stadiumin “Elbasan Arena” për të marrë 3 pikët. Ai foli edhe për ndeshjen që kuqezinjtë do të zhvillojnë ndaj Kosovës si dhe për synimet për të ardhmen. “Atmosfera është e mirë”, – ka thënë fillimisht Mitaj.
“Pak a shumë e njohim njëri-tjetrin sepse jemi grumbulluar shumë herë, – ka vijuar ai. -Nga ana fizike nuk kemi dëmtime dhe shpresojmë të shkojmë kështu deri në fund.” Për futbollistin kuqez, ndeshja e kthimit me Slloveninë do të jetë më e vështirë sesa e para, të cilën Shpresat e fituan në Stadiumin “Elbasan Arena”. “Ne si Shqipëri do të futemi siç u futëm në “Elbasan Arena”, 100% të përqendruar”, – ka thënë ai.
“Do të futemi me të njëjtin mentalitet. Nuk do të jetë e lehtë sepse e dimë që Sllovenia do të jetë më e fortë se ç’ishte, – ka vijuar mbrojtësi i majtë. – Objektivi ynë është të futemi dhe të marrim 3 pikët dhe nuk duhet të kemi frikë pasi mund të përballojmë çdo kundërshtar.” Mitaj ka folur edhe për sfidën e dytë, atë me Kosovën. Çdo ndeshje është shumë e rëndësishme, sidomos kjo e Kosovës pasi është në fushë të huaj”, – ka thënë ai.
“Është një ekip shumë i fortë, kemi luajtur disa ndeshje, por kjo nuk na ndalon nga objektivi ynë që të marrim tre pikët”, – ka shtuar Mitaj, i cili në mbyllje të konferencës për shtyp, ka folur edhe për objektivat personalë. “Synimi tani për tani është që të luaj sa më shumë për klubin”, – ka përfunduar talenti shqiptar i AEK-ut të Athinës dhe i Shpresave të Shqipërisë, Mario Mitaj.
