ASNN – Kombëtarja shqiptare e Nën-21-vjeçarëve do të luajë ndeshjen e radhës me Kosovën, të vlefshme për Eliminatoret e Evropianit 2020 të kësaj grupmoshe. Kosova vjen si kryesuese e grupit dhe trajneri i kuqezinjve nën 21 vjeç, Alban Bushi, i njeh dhe i vlerëson cilësitë e kundërshtarit. Megjithatë, kërkon nga skuadra e tij rezultatin pozitiv në këtë përballje. Më 15 tetor, Shpresat kuqezi do të përballen me bashkëmoshatarët e vet të Kosovës në Stadiumin “Elbasan Arena”, në një ndeshje të vlefshme për Eliminatoret e Evropianit të kësaj grupmoshe.
Trajneri i kuqezinjve e vlerëson kundërshtarin për grintën dhe ambiciet që ka. “Kundërshtarin e njohim, është i fortë dhe pretendent për t’u kualifikuar, – thotë ai. – Ata kanë një grup të lidhur, ndryshe nga ne që bëjmë shumë ndryshime, pasi furnizojmë Kombëtaren e parë. 3-4 lojtarë të Kosovës, nuk dua të përmend emra, i kemi kontaktuar para dy vjetësh por, nuk kanë pranuar të vijnë me ne, edhe pse, për ne nuk është problem. Pika e tyre më e fortë është agresiviteti dhe dëshira që kanë për të fituar, diçka që te lojtarët tanë nuk e kanë në 90 minuta, kanë luhatje në agresivitetin gjatë lojës.”
“Unë mendoj se Kosova është një hap më lart se ne në këtë aspekt, – ka vijuar ish-futbollisti i Kombëtares kuqezi. – Po t’i shikosh lojtarët tanë, kanë më shumë cilësi se ata. Por, kjo grinta duket se e mposht cilësinë, duke dhënë 100% në fushën e lojës dhe agresivitetin që unë kërkoj te skuadra, ne do dalim me rezultat pozitiv. Kosova i ka të gjithë lojtarët që luajnë titullar dhe marrin minuta.” Kosova me meritë ndodhet në krye të grupit me 6 pikë, në 3 ndeshje, një më pak se Shqipëria që ka 2 pikë në 4 sfida të luajtura.
Megjithatë, trajneri Bushi kërkon rezultatin pozitiv nga skuadra e tij, mbi të gjitha edhe për arsye se ndeshja luhet në fushën e saj. “Ne duhet të japim maksimumin, pavarësisht forcës së kundërshtarit që kemi përballë, – ka thënë ai. – Këto ndeshje shërbejnë për t’u rritur dhe fituar elementë për brezin e ardhshëm. Jemi duke u zhvilluar, kemi lojtarë shumë të mirë, por ne mendojmë edhe për Kombëtaren A, e cila ka marrë shumë lojtarë në tre vitet e fundit. Ne ëndërrojmë Evropianin dhe mundohemi të bëjmë maksimumin.”
“Unë nuk kërkoj asgjë nga skuadra, përveçse faktit të luftojë dhe të japë gjithmonë maksimumin në fushën e lojës, atë që ka brenda atyre, – theksoi ai. – Në lojë duhet të luftosh 95 minuta. Duhet të pranojmë që këta janë lojtarët që kemi në dispozicion. Jemi të kënaqur, kur shohim lojtarët e Shpresave që bashkohen me ekipin A. Kjo na bën krenarë dhe shpresojmë që me Kosovën të bëjmë të lumtur tifozët tanë.” Në konferencën për shtyp, të mbajtur në mjediset e FSHF-së, ku ka zbardhur listën e futbollistëve të grumbulluar për ndeshjen eliminatore ndaj Kosovës.
“Selmani mund të jetë pesë e Kombëtares A, këtë nuk e dimë ende, – ka thënë trajneri i Shpresave, duke analizuar kontingjentin që ka në dispozicion. – Në përgjithësi mendoj që lojtarët të cilët kanë më shumë minuta duhet të vijnë në Kombëtare. Kemi bërë 4 ndeshje dhe mendoj se gabimin e vetëm e kemi bërë vetëm me Andorrën. Me Turqinë kemi bërë mirë, ndërsa me Austrinë kemi bërë lojën më të dobët në këto eliminatore. Duhet të ishim më agresivë dhe skuadra u shpërbë në 20 minutat e fundit.”
“Gjë që nuk ka ndodhur në ndeshjet e mëparshme, – ka vijuar Bushi. – Objektivi i Shpresave është të futemi për fitore, por duhet të nxjerrim lojtarë për Kombëtaren A. Ka shumë lojtarë si Bullari, Broja, Ndreçka, Kalaj dhe Pëllumbi që nuk e kanë moshën për te ne, por ne i marrim, i japim minuta, por kjo ka kostot e veta, pasi ata luajnë me lojtarë tre vjet më të mëdhenj.” Kjo përballje do të zhvillohet në datën 15 tetor, në stadiumin “Elbasan Arena”, ora 19:00 dhe trajneri kuqezi ka një apel: “Tifozët na kanë mbështetur, ekipin kombëtar duhet ta mbështesin, pavarësisht orarit apo kohës së keqe. Unë mendoj se me Kosovën do të ketë tifozë në stadium.”
