ASNN – Ajo ishte medalja e artë më e dëshiruar prej tyre dhe, duke i dhënë fund një pritjeje të gjatë, brazilianët ia kanë dalë më në fund të shpallen kampionë olimpikë në futboll për meshkuj. Dhe ata e kanë arritur këtë pikërisht në shtëpinë e tyre, duke mposhtur në finale Gjermaninë, por vetëm pas goditjeve të 11-metërshave. Sikundër e gjithë Olimpiada, edhe finalja e futbollit të meshkujve u soll për sportdashësit drejtpërdrejt nga Rrjeti i Radio-Televizionit Shqiptar.

Brazili është shpallur kampion olimpik në futboll për meshkuj, duke mposhtur Gjermaninë në finale, por vetëm pas goditjeve të 11-metërshave, pasi koha e rregullt dhe ajo shtesë u mbyllën në barazim 1-1. Megjithatë, për të marrë këtë medalje olimpike, brazilianëve u është dashur për të pritur, në kuptimin e vërtetë të fjalës, deri në goditjen e fundit.

Vendasit, të udhëhequr nga futbollisti i Barcelonës, Nejmari, kanë kaluar të parët në epërsi në minutën e 27-të, pas një ekzekutimi mjeshtëror që ai i bëri një goditjeje të lirë në kufinjtë e zonës. E këtë epërsi minimale të Brazilit do të mbyllen 45 minutat e para, ndërsa gjermanët, të cilët kishin goditur 3 herë portën e vendasve në pjesën e parë, e gjetën më në fund golin në minutën e 59-të, me anë të Maks Majerit.

Në barazim 1-1 do të mbyllen 90 minutat e kohës së rregullt, ashtu sikundër edhe gjysmëora shtesë nuk do të sjellë gola të tjerë dhe gjithçka do t’u drejtohet goditjeve nga pika e bardhë e 11-metërshave. Në një duel nervash, gjermanët do të gabojnë goditjen e 5-të dhe do të jetë pikërisht Nejmari ai që do të realizojë, duke e çuar tifozerinë vendase në delir.

Libri i artë i futbollit në olimpiada

1900               Britania e Madhe

1904               Kanadaja

1908               Britania e Madhe

1912               Britania e Madhe

1920               Belgjika

1924               Uruguai

1928               Uruguai

1936               Italia

1948               Suedia

1952               Hungaria

1956               Bashkimi Sovjetik

1960               Jugosllavia

1964               Hungaria

1968               Hungaria

1972               Polonia

1976               Gjermania Lindore

1980               Çekosllovakia

1984               Franca

1988               Bashkimi Sovjetik

1992               Spanja

1996               Nigeria

2000               Kameruni

2004               Argjentina

2008               Argjentina

2012               Meksika

2016               Brazili